ദുബായ്

വൈകല്യങ്ങൾ മറന്ന് ഷിഹാബും പ്രോട്ടോകോൾ ഇല്ലാതെ കെ ഇ ഫൈസലും ദുബൈയുടെ ഹൃദയം കവർന്ന രാത്രി – അനുഭവങ്ങളുടെ വിശാല പ്രപഞ്ചം തുറന്ന് ഐ പി എ

വേറിട്ട വിജയം കൈവരിച്ച സംരംഭകന്റെ അനുഭവങ്ങളും,ശുഭാപ്തിവിശ്വാസമേകിയ സി പി ശിഹാബിന്റെ പ്രചോദന ഭാഷണവും “ഐ പി എ ബിഗ് നൈറ്റിനെ” ശ്രദ്ധേയമാക്കി. ദുബൈയിലെ ചെറുകിട സംരംഭകരുടെ വേദിയായ ഇന്റർനാഷണൽ പ്രൊമോട്ടേഴ്സ് അസോസിയേഷനാണ് സമൂഹത്തിന് മാതൃകയായ വ്യക്തികളെ പങ്കെടുപ്പിച്ചു കൊണ്ട് “ഐപിഎ ബിഗ് നൈറ്റ്” എന്ന പേരിൽ പരിപാടി സംഘടിപ്പിച്ചത്. ഫൈസൽ ആൻഡ് ഷബാന ഫൗണ്ടേഷൻ സഹസ്ഥാപകനും,കെഫ് ഹോൾഡിങ്സ് ചെയർമാനുമായ ഫൈസൽ ഇ കൊട്ടിക്കോളൻ ജീവിതാനുഭവങ്ങളുമായി ചടങ്ങിൽ സംവദിച്ചു.കഴിഞ്ഞ ദിവസം ദുബൈ ദേരാ ക്രൗൺ പ്ലാസ ഹോട്ടലിലാണ് പരിപാടി നടന്നത്

നൂതനവും, മൂല്യാധിഷ്ഠിതമായ വിദ്യാഭ്യാസ സംവിധാന പ്രക്രിയയാണ് സമൂഹത്തിന് ആവശ്യമെന്ന് ഫൈസൽ കൊട്ടിക്കോളൻ പറഞ്ഞു. വിദ്യാഭ്യാസത്തിന് മാത്രമേ സമൂഹത്തിൽ കാതലായ മാറ്റങ്ങൾ കൊണ്ടുവരാൻ കഴിയൂ.ഗുണമേന്മയുള്ള വിദ്യാഭ്യാസമാണ് കാലത്തിന്റെ ആവശ്യം. അതിന്റെ സേവനം സമൂഹത്തിൽ അവശതയനുഭവിക്കുന്നവരുൾപ്പെടെ എല്ലാവരിലേക്കും എത്തണം. പൊതുവിദ്യാഭ്യാസ രംഗത്ത് പുതിയ മാതൃക സൃഷ്ടിച്ച നടക്കാവ് സ്കൂളിൽ- തന്റെ നേതൃത്വത്തിലുള്ള ഫൗണ്ടേഷൻ നടപ്പാക്കിയ മാതൃകാ പദ്ധതിയെക്കുറിച്ച് സംസാരിക്കുകയായിരുന്നു അദ്ദേഹം.ബിസിനസ് സംരംഭങ്ങളെ ഏറ്റവും നന്നായി പ്രോത്സാഹിപ്പിക്കുന്ന രാജ്യമാണ് യു എ ഇ. ഏറ്റവും എളുപ്പത്തിൽ സുരക്ഷിതമായി സംരംഭങ്ങൾ തുടങ്ങാൻ ഈ രാജ്യത്ത് സാധിക്കുന്നു. ദീർഘവീക്ഷണമുള്ള ഭരണാധികാരികളാണ് യുഎഇയെ നയിക്കുന്നതെന്ന് അദ്ദേഹം കൂട്ടിച്ചേർത്തു.

സ്വന്തം ജീവിതം കൊണ്ട്- സമൂഹത്തിന് പ്രചോദനമേകിയ സി പി ശീഹാബിന്റെ വാക്കുകൾ സദസ്സിനു നവ്യാനുഭവമായി.പരാതികളും പരിഭവങ്ങളുമായി കഴിയുന്നതിന് പകരം സമയവും സാഹചര്യവും കണക്കിലെടുത്ത് ഉണർന്നുപ്രവർത്തിച്ചതിന്റെ ഫലമായി താൻ നേടിയ നേട്ടങ്ങൾ ഓരോന്നും അദ്ദേഹം പങ്കുവെച്ചു. ജീവിതം മനോഹരമാക്കുന്നതിൽ മനോഭാവത്തിന്റെ പ്രാധാന്യത്തെ കുറിച്ച് ശിഹാബ് ഓർമപ്പെടുത്തി .നാം നമ്മെ സ്വയം തിരിച്ചറിയുക. നിഷേധാത്മകമായ മനോഭാവം നമ്മുടെ ജീവിതത്തെ പരാജയത്തിലേക്ക് തള്ളിവിടുന്നു. എന്തിനും ഏതിനും നിഷേധാത്മകമായ മനോഭാവം വെച്ചുപുലർത്താതെ അവസാന നിമിഷം വരെ ലക്ഷ്യത്തിന് വേണ്ടി നിരന്തരം പരിശ്രമിക്കുക.ഭാവന, ശുഭപ്രതീക്ഷ,മൂല്യം, പ്രചോദനം, ആഗ്രഹം എന്നിവയാണ് ഒന്നുമില്ലായ്മയിൽ നിന്നും തന്റെ ജീവിതത്തെ മുന്നോട്ടു നയിച്ചതെന്ന് സി പി ശീഹാബ് പറഞ്ഞു. ഇരുകരങ്ങളും, കാലുകളുമില്ലാതെ. ജീവിതവഴിയിൽ വേറിട്ട മാതൃക സൃഷ്ടിച്ച വ്യക്തിയാണ് സി പി ശിഹാബ് എന്ന ചെറുപ്പക്കാരൻ.

ചടങ്ങിൽ കെ ഇ ഫൈസലിനെയും സി പി ശീഹാബിനെയും മൊമെന്റോ നൽകി ആദരിച്ചു.ഐ പി എ ചെയർമാൻ ശംസുദ്ധീൻ നെല്ലറ, സ്ഥാപകൻ എ കെ ഫൈസൽ തുടങ്ങിയവർ സംസാരിച്ചു .49 മത് യു എ ഇ ദേശീയ ദിനാഘോഷവും പരിപാടിയോടനുബന്ധിച്ച് നടന്നു.രാജ്യത്തിന്റെ ദേശീയ പതാക ആലേഖനം ചെയ്ത കേക്ക് ചടങ്ങിൽ മുറിച്ചു. ദുബായിലെ നവ സംരംഭങ്ങളുടെ ലോഗോ പ്രകാശനവും, സംരംഭങ്ങളുടെ സാധ്യതകളും ചടങ്ങിൽ അവതരിപ്പിച്ചു.ഡോക്ടറേറ്റ് ലഭിച്ച ഷാർജ ഇന്ത്യൻ അസോസിയേഷൻ പ്രസിഡണ്ട് ഇ പി ജോൺസണെ പരിപാടിയിൽ ആദരിച്ചു. വിവിധ മേഖലകളിൽ മികവ് തെളിയിച്ച ഐ പി എ അംഗങ്ങളുടെ മക്കളെ മൊമെന്റോ നൽകി പ്രത്യേകം ആദരിച്ചു.ത്വൽഹത്ത് ഫോറം ഗ്രുപ്പ് സ്വാഗതം പറഞ്ഞു. എ എ കെ മുസ്തഫ, ബഷീർ പാൻ ഗൾഫ്, റിയാസ് കിൽട്ടൻ, മുനീർ അൽ വഫ,കലാം, റഫീഖ് സിയാന, ഫിറോസ് പയ്യോളി, മോഹൻദാസ്, ഹക്കീം തുടങ്ങിയവർ പരിപാടിക്ക് നേതൃത്വം നൽകി.

—ഫൈസൽ ഇ കൊട്ടിക്കോളനെ ഐ പി എ ബിഗ് നൈറ്റിൽ മൊമെന്റോ നൽകി ആദരിക്കുന്നു.—

 

 

error: Content is protected !!