അന്തർദേശീയം അബൂദാബി ഇന്ത്യ

ഗൾഫിൽ നിന്നുള്ള ചെറുകിട ഇന്ത്യൻ നിക്ഷേപകരെ ഉൾപ്പെടുത്തി പബ്ലിക് പ്രൈവറ്റ് പങ്കാളിത്തം ശക്തിപ്പെടുത്തണമെന്ന് എം.എ യൂസഫലി.

വിദേശത്ത് കഴിയുന്ന ഇന്ത്യക്കാരായ നിക്ഷേപകരുടെ ഇടപെടൽ കൊണ്ട് ഇന്ത്യയിൽ വൻകിട പദ്ധതികൾ ആരംഭിക്കുന്നതോടൊപ്പം ചെറുകിട ഇടത്തരം NRI നിക്ഷേപകരെ കൂടി ഉൾപ്പെടുത്തിക്കൊണ്ട് പബ്ലിക് പ്രൈവറ്റ് പങ്കാളിത്ത പദ്ധതികൾ സജീവമാക്കണമെന്ന് ലുലു ഗ്രൂപ്പ് ചെയർമാൻ എം.എ യൂസഫലി അഭിപ്രായപ്പെട്ടു.16 മത് പ്രവാസി ഭാരത് ദിവസ് സമ്മേളനത്തിൽ സംസാരിക്കുകയായിരുന്നു എം. എ യൂസഫലി.മഹാമാരിയുടെ അതിതീവ്ര കാലഘട്ടത്തിൽ പ്രധാനമന്ത്രി നരേന്ദ്രമോദി തന്റെ വ്യക്തിപരമായ അടുപ്പവും പരിചയവും വെച്ചുകൊണ്ട് ഗൾഫിലെ ഭരണാധികാരികളുമായി നേരിട്ട് സംസാരിച്ച് ഉറപ്പ് വരുത്തിയ NRI സംരക്ഷണം ചരിത്രമുള്ളിടത്തോളം സ്മരിക്കുമെന്ന് യൂസഫലി വ്യക്‌തമാക്കി.

പ്രധാനമന്ത്രിക്കൊപ്പം വിദേശകാര്യമന്ത്രി ജയശങ്കർ നേരിട്ടുതന്നെ ചില ഗൾഫ് നാടുകളിൽ സന്ദർശനം നടത്തുകയും ഇന്ത്യക്കാരുടെ പ്രശ്നങ്ങൾ നേരിട്ട് മനസിലാക്കുകയും ചെയ്തതും ശ്ലാഘനീയമാണെന്ന് അദ്ദേഹം പറഞ്ഞു. ഇന്ത്യ നടപ്പിലാക്കുന്ന പ്രധാനമന്ത്രിയുടെ സ്വപ്നപദ്ധതിയായ ആത്മ നിർഭർ ഭാരത് വളരെ അധികം സാധ്യതകൾ പ്രയോജനപ്പെടുത്തികൊണ്ട് മുന്നോട്ട് കൊണ്ടുപോകാൻ പറ്റുന്ന സർവകാല പദ്ധതികളിൽ ഒന്നാണെന്നും യൂസഫലി അഭിപ്രായപ്പെട്ടു.വിദേശ ഇന്ത്യക്കാരുടെ കാര്യത്തിൽ തന്റെ ഒരു സുഹൃത്ത് ഓർമ്മിപ്പിച്ചത് പോലെ ശരീരം കെനിയയിലാണെങ്കിലും ധനം ലണ്ടനിലാണെങ്കിലും മനസ്സ് ഇന്ത്യയിലാണെന്നതാണ് എല്ലാവരുടെയും അവസ്ഥയെന്ന് അദ്ദേഹം ഓർമ്മിപ്പിച്ചു.

തൻ ധൻ മൻ എന്നിങ്ങനെ 3 പദങ്ങൾ കൊണ്ട് യൂസഫലി നടത്തിയ പരാമർശം സജീവമായി ശ്രദ്ധിക്കപ്പെട്ടു.ഗൾഫ് മേഖലയിലുള്ള 9 മില്ല്യണിലധികം വരുന്ന പ്രവാസി ഇന്ത്യക്കാർ ഇന്ത്യക്ക് വേണ്ടി നൽകിക്കൊണ്ടിരിക്കുന്ന സംഭാവനകളിൽ പ്രധാനമന്ത്രി മതിപ്പ് പ്രകടിപ്പിച്ചത് എല്ലാവർക്കും ആവേശം പകരുന്നതാണ്.ചരിത്രത്തിലെ ഏറ്റവും വലിയ നേരിട്ടുള്ള വിദേശനിക്ഷേപം ഇന്ത്യയിലേക്ക് വരാൻ കാരണമായ ഇത്തരം പ്രോത്സാഹന പരിപാടികൾ തുടർന്ന് കൊണ്ട് പോകാൻ സർവ്വവിധ ഭാവുകങ്ങളും യൂസഫലി നേർന്നു. അരിയും പഴം പച്ചക്കറികളും ഇറച്ചി ഉത്പന്നങ്ങളും ഗാർമെൻറ്സും ഇന്ത്യ സജീവമായി കയറ്റി അയക്കുകയാണ് 130 കോടി ആളുകളുടെ വിഷയം പരിഗണിച്ചിട്ട് അവരുടെ വിഷയം നോക്കിയ ശേഷമാണ് ബാക്കിയുള്ളത് കയറ്റി അയക്കാൻ സാഹചര്യം ഒരുങ്ങിയിരിക്കുന്നതെന്നും അത് രാജ്യത്തിൻറെ വളർച്ചയെയാണ് കാണിക്കുന്നതെന്നും യൂസഫലി പറഞ്ഞു.

ലുലു ഗ്രൂപ്പ് തന്നെ ഭക്ഷ്യ ഉത്പന്നങ്ങളിൽ മാത്രമായി 3500 കോടി രൂപയുടെ കയറ്റുമതിയാണ് ഒരു വർഷം നടത്തിക്കൊണ്ടിരുന്നത്. മറ്റുള്ളവർക്കും ഇത്തരത്തിൽ കനത്ത സംഭാവന ചെയ്യാൻ കഴിയുന്നതേയുള്ളൂവെന്ന് യൂസഫലി ഓർമ്മിപ്പിച്ചു.കോവിഡ് കാലഘട്ടത്തിൽ ഗൾഫിലെ ഭരണാധികാരികൾ സ്വദേശികൾക്ക് നൽകിയ അതെ പരിഗണന പ്രവാസി ഇന്ത്യക്കാർക്കും നൽകിയതിന് പിന്നിൽ പ്രധാമന്ത്രിയുടെയും നമ്മുടെ ഗവൺമെന്റിന്റെയും നിരന്തരമായ ഇടപെടൽ സ്വാധീനം ചെലുത്തിയിട്ടുണ്ടെന്നും അത് അഭിമാനകരം തന്നെയാണെന്ന് യൂസഫലി ഓർമ്മിപ്പിച്ചു.ഇന്ത്യയുടെ വാണിജ്യമന്ത്രിയുടെ ഇടപെടലുകളും അസാധാരണമായ വളർച്ചയിലേക്ക് കാര്യങ്ങൾ കൊണ്ടെത്തിക്കുകയാണെന്നും അദ്ദേഹം പറഞ്ഞു.

ഭക്ഷ്യോൽപ്പന്നം പോലെ ആരോഗ്യസംരക്ഷണം, സാങ്കേതികവിദ്യ, വിനോദസഞ്ചാരം എന്നിവയിലെല്ലാം കാര്യമായ സംഭാവനകൾ നൽകാൻ കഴിയുമെന്നും ഇടത്തരം നിക്ഷേപകർ മുന്നോട്ട് വരണമെന്നും യൂസഫലി അഭ്യർത്ഥിച്ചു.47 വർഷത്തെ തന്റെ ഗൾഫ് ജീവിതത്തിനിടയിൽ ഇത്രമേൽ ഇന്ത്യൻ ഭരണാധികാരികൾ ഗൾഫ് മേഖലയിലെ ഭരണാധികാരികളെ സ്വാധീനിച്ച ഒരു സന്ദർഭം വേറെ ഉണ്ടായിട്ടില്ലെന്നും യൂസഫലി പ്രശംസിച്ചു. അക്കാര്യത്തിൽ ആത്മനിർഭർ ഭാരത് തുടങ്ങി വെക്കുന്ന പദ്ധതികൾ ചരിത്രത്തിലെ ശ്ലാഘനീയമായ പദ്ധതികളായി മാറുമെന്ന പ്രതീക്ഷയാണുള്ളതെന്നും അദ്ദേഹം പറഞ്ഞു.

യൂസഫലിയുടെ “ധൻ തൻ മൻ ” പ്രയോഗം

പ്രവാസി ഭാരതീയ ദിവസ് സമ്മേളനത്തെ അഭിസംബോധന ചെയ്യവേ എം.എ. യൂസഫലി  ഒരിക്കൽ ആഫ്രിക്കയിൽ പോയതിനെപ്പറ്റി പറയുകയുണ്ടായി.  അവിടെയുള്ള ഒരു വ്യവസായി യൂസഫലിയോട് പറഞ്ഞതിങ്ങനെയാണ്. ഞങ്ങളുടെ ധനം ലണ്ടനിലാണ്, ഞങ്ങളുടെ അസ്തിത്വം കെനിയയിലും , ഞങ്ങളുടെ മനസ്സ് അങ്ങ് ഇന്ത്യയിലുമാണ്. ഇതിനു യൂസഫലി മറുപടി പറഞ്ഞത് ”  ഗൾഫിലുള്ള പ്രവാസി ഇന്ത്യക്കാരുടെ ധനവും, അസ്തിത്വവും, മനസ്സും എല്ലായിപ്പോഴും ഇന്ത്യയിലാണ് എന്നാണ്”.
ഇന്ത്യയുമായി ഗൾഫ് രാജ്യങ്ങളിലുള്ള പ്രവാസികളുടെ അടുപ്പത്തെപ്പറ്റിയുള്ള യൂസഫലിയുടെ ഈ വാക്കുകളെ വിദേശകാര്യ മന്ത്രാലയം സെക്രട്ടറി സജ്ഞയ് ഭട്ടാചര്യ പ്രത്യേകം അഭിനന്ദിക്കുകയുണ്ടായി.

error: Content is protected !!