Info ദുബായ്

മലയാളി ആയുര്‍വേദ ഡോക്ടര്‍ ഷമീമ അബ്ദുല്‍ നാസറിന് പത്ത് വര്‍ഷത്തെ യുഎഇ ഗോള്‍ഡന്‍ വിസ

Shamima Abdul Nasser, a Malayalee Ayurveda doctor, has been granted a 10-year UAE Golden Visa

മലയാളി ആയുര്‍വേദ ഡോക്ടര്‍ ഷമീമ അബ്ദുല്‍ നാസറിന് പത്ത് വര്‍ഷത്തെ യുഎഇ ഗോള്‍ഡന്‍ വിസ ലഭിച്ചു. അജ്മാനിലെ മെട്രോ മെഡിക്കല്‍ സെന്ററില്‍ ആയുര്‍വേദ ഡിപാര്‍ട്ട്‌മെന്റ് മേധാവിയായി ജോലി ചെയ്യുകയാണ്. 2005 മുതല്‍ യുഎഇയില്‍ ആയുര്‍വേദമേഖലയില്‍ സേവനമനുഷ്ഠിക്കുന്ന ഡോ. ഷമീമ അബ്ദുല്‍ നാസറിന്റെ പ്രവര്‍ത്തന മികവിനെ ആദരിച്ചുകൊണ്ടാണ് അജ്‌മാൻ എമിഗ്രേഷൻ അധികൃതര്‍ ഗോള്‍ഡന്‍ വിസ അനുവദിച്ചിരിക്കുന്നത്.

16 വര്‍ഷമായി യുഎഇയില്‍ പ്രവര്‍ത്തിക്കുന്ന ഡോ. ഷമീമ അബ്ദുല്‍ നാസര്‍ കേരളം, ഡല്‍ഹി, ബഹ്‌റൈന്‍ എന്നിവിടങ്ങളിലും ആയുര്‍വേദ ഡോക്ടറായി പ്രാക്ടീസ് ചെയ്തിട്ടുണ്ട്. പ്രമുഖ ചരിത്രകാരനായ ഡോ. മുസ്തഫ കമാല്‍ പാഷയുടെയും, പ്രൊഫസര്‍ ഹബീബ പാഷയുടെയും മകളായ ഡോ. ഷമീമ, മലപ്പുറം ജില്ലയിലെ തിരൂരങ്ങാടി സ്വദേശിനിയാണ്. ഗള്‍ഫ് മേഖലയില്‍ ആയുര്‍വേദത്തിന് ലഭിച്ച അംഗീകാരം കൂടിയാണ് തന്റെ നേട്ടമെന്ന് ഡോ. ഷമീമ അബ്ദുല്‍ നാസര്‍ പറഞ്ഞു.

യുഎഇയിലെ പത്ര, ദൃശ്യ, റേഡിയോ മാധ്യമങ്ങളിലെ സജീവ സാന്നിധ്യം കൂടിയാണ് ഡോ. ഷമീമ. ടിവി, റേഡിയോ ടോക്ക് ഷോകളില്‍ ആരോഗ്യ വിഷയങ്ങള്‍ അവതരിപ്പിക്കുന്നതിനൊപ്പം, വിവിധ ദിനപത്രങ്ങളില്‍ ലേഖനങ്ങളും എഴുതുന്നു. പ്രവാസി സമൂഹത്തിന്റെ ആരോഗ്യ വിഷയങ്ങളില്‍ സംവദിച്ച് സാമൂഹ്യ മാധ്യമങ്ങളിലും ശ്രദ്ധേയമായ ഇടപെടല്‍ നടത്തുന്ന ഡോക്ടര്‍ ഷമീമ, യുഎഇയിലെ ആയുര്‍വേദ രംഗത്തെ സുപരിചിത സാന്നിധ്യമാണ്. ആതുര സേവന രംഗത്തെ മികവിന് പ്രവാസ ലോകത്തെ നിരവധി പുരസ്‌ക്കാരങ്ങളും അവരെ തേടിയെത്തിയിട്ടുണ്ട്. കോട്ടക്കല്‍ ആയുര്‍വേദ കോളേജില്‍ നിന്നാണ് ബിഎഎംഎസ് പൂര്‍ത്തിയാക്കിയത്. പിഎസ്എംഒ കോളേജ് തിരൂരങ്ങാടിയില്‍ നിന്നും കോളേജ് പ്രീഡിഗ്രിയും, തിരൂരങ്ങാടി ഓറിയന്റല്‍ സ്‌കൂളില്‍ നിന്നും സ്‌കൂള്‍ വിദ്യാഭ്യാസവും പൂര്‍ത്തിയാക്കി. മീഡിയ വണ്‍ ടിവി മിഡില്‍ ഈസ്റ്റ് എഡിറ്റോറിയല്‍ വിഭാഗം മേധാവിയായ എം.സി.എ നാസറിന്റെ ഭാര്യയാണ്. മക്കള്‍: അഫ്‌നാന്‍, ലിയാന്‍, മിന്‍ഹ, മിദ്ഹ.

error: Content is protected !!