ഇ-സ്കൂട്ടറുകളും സൈക്കിളുകളും ഉൾപ്പെട്ട വ്യത്യസ്ത അപകടങ്ങളിൽ ഈ വർഷം ആദ്യ പകുതിയിൽ നാല് പേർക്ക് ജീവൻ നഷ്ടപ്പെട്ടതായി ദുബായ് പോലീസ് വെളിപ്പെടുത്തി. ഇത്തരം അപകടങ്ങളിൽ 25 പേർക്ക് പരിക്കേറ്റതായും പോലീസ് അറിയിച്ചു.
അപകടങ്ങൾ എപ്പോൾ സംഭവിച്ചുവെന്നോ എങ്ങനെയെന്നോ ദുബായ് പോലീസ് വെളിപ്പെടുത്തിയിട്ടില്ല, എന്നാൽ 2024-ലെ ആദ്യ ആറ് മാസത്തിനുള്ളിൽ 7,800-ലധികം ട്രാഫിക് നിയമലംഘനങ്ങൾ രേഖപ്പെടുത്തിയതായും 4,474 ഇ-സ്കൂട്ടറുകളും സൈക്കിളുകളും കണ്ടുകെട്ടിയതായും പോലീസ് പറഞ്ഞു.
പ്രതിദിനം ശരാശരി 43 ട്രാഫിക് ലംഘനങ്ങൾ രേഖപ്പെടുത്തുകയും 24 ഇ-സ്കൂട്ടറുകൾ അല്ലെങ്കിൽ സൈക്കിളുകൾ ദുബായിൽ അധികൃതർ പിടിച്ചെടുക്കുകയും ചെയ്തിട്ടുണ്ട്.
അനധികൃത സ്ഥലങ്ങളിലോ പൊതു റോഡുകളിലോ ഇ-സ്കൂട്ടറുകളോ സൈക്കിളുകളോ ഉപയോഗിക്കുമ്പോൾ ഉണ്ടാകുന്ന പ്രധാനമായ അപകടസാധ്യതകളും ഓപ്പറേഷൻസ് അഫയേഴ്സ് അസിസ്റ്റൻ്റ് കമാൻഡൻ്റ് മേജർ ജനറൽ അബ്ദുല്ല അലി അൽ ഗൈത്തി എടുത്തുകാണിച്ചു.
60 കിലോമീറ്ററിൽ കൂടുതൽ വേഗപരിധിയുള്ള റോഡുകളിൽ ഓടിക്കുക, അപകടകരമായ രീതിയിൽ ഓടിക്കുക, ഇ-സ്കൂട്ടറിൽ യാത്രക്കാരെ കയറ്റുക, ട്രാഫിക്കിനെതിരെ ഓടിക്കുക തുടങ്ങിയ നിയമലംഘനങ്ങൾക്ക് 300 ദിർഹം വരെ പിഴ ചുമത്തുമെന്നും അധികൃതർ ഓർമ്മിപ്പിച്ചു.
