ഷാർജയിൽ ഇന്ന് നടത്തിയ ഒരു സാമൂഹിക പരീക്ഷണത്തിൽ “അപരിചിതമായ അപകടം” കണ്ടെത്തുന്നതിൽ മിക്കവാറും കുട്ടികളും പരാജയപ്പെട്ടതായി ഷാർജ ചൈൽഡ് സേഫ്റ്റി ഡിപ്പാർട്ട്‌മെൻ്റ് കണ്ടെത്തി.
ഷാർജയിലെ ക്ഷീഷാ പാർക്കിൽ (Kshisha Park) ഷാർജ ചൈൽഡ് സേഫ്റ്റി ഡിപ്പാർട്ട്‌മെൻ്റ് നടത്തിയ ഒരു പരീക്ഷണത്തിലാണ് ഒരു ഐസ്ക്രീം കച്ചവടക്കാരൻ സൗജന്യമായി ഐസ്ക്രീം കൊടുക്കുന്നുണ്ടെന്ന് അറിഞ്ഞപ്പോൾ മിക്ക കുട്ടികളും വാങ്ങികഴിച്ചത്. പാർക്കിൽ ഉണ്ടായിരുന്ന 97 ശതമാനം കുട്ടികളും സൗജന്യ ഐസ്‌ക്രീമിനായി അപരിചിതനായ കച്ചവടക്കാരന്റെ വാനിൽ കയറി.
ഇന്ന് ബുധനാഴ്ച ഷാർജ പോലീസുമായി സഹകരിച്ചാണ് ഷാർജ ചൈൽഡ് സേഫ്റ്റി ഡിപ്പാർട്ട്‌മെൻ്റ് ഈ പരീക്ഷണം നടത്തിയത്. ഈ സാമൂഹിക പരീക്ഷണത്തിൽ പ്രകടമായതുപോലെ, കുട്ടികളുടെ അവബോധമില്ലായ്മയെക്കുറിച്ച് ഭയപ്പെടുത്തുന്ന യാഥാർത്ഥ്യം മനസിലായതായി ചൈൽഡ് സേഫ്റ്റി ഡിപ്പാർട്ട്‌മെൻ്റ് അറിയിച്ചു.
അപരിചിതരുമായി ഇടപഴകുമ്പോൾ കുട്ടികളുടെ സുരക്ഷാ ബോധവൽക്കരണ നിലവാരം വിലയിരുത്തുന്നതിനും അവർക്കും പരിചരിക്കുന്നവർക്കും സുരക്ഷിതമായി നാവിഗേറ്റ് ചെയ്യുന്നതിനും അപരിചിതരുടെ അപകടം ഒഴിവാക്കുന്നതിനും ആവശ്യമായ മാർഗനിർദേശങ്ങൾ മനസ്സിലാക്കുന്നതിനാണ് ഈ സാമൂഹിക പരീക്ഷണം രൂപകൽപ്പന ചെയ്തത്.
ചൈൽഡ് സേഫ്റ്റി ഡിപ്പാർട്ട്‌മെൻ്റ് പറയുന്നതനുസരിച്ച്, ഇത്തരം സാഹചര്യങ്ങളിൽ സുരക്ഷിതമായി ഇടപെടാനുള്ള അറിവ് കുട്ടികൾക്ക് ഉണ്ടാവണം.കുട്ടികളുടെ സുരക്ഷ ഉറപ്പാക്കുന്നതിന് അവബോധം വളർത്തുന്നതിനും വിദ്യാഭ്യാസ പരിപാടികൾ ശക്തിപ്പെടുത്തുന്നതിനും സഹകരിക്കാൻ രക്ഷിതാക്കളോടും അധ്യാപകരോടും വിശാലമായ സമൂഹത്തോടും ചൈൽഡ് സേഫ്റ്റി ഡിപ്പാർട്ട്‌മെൻ്റ് ആഹ്വാനം ചെയ്തിട്ടുണ്ട്.
