സന്ദർശന വിസയിൽ ദുബായിലെത്തിയ മലയാളി യുവാവിനെ കാണാതായതായി ബന്ധുക്കൾ നോർക്ക റൂട്ട്സിൽ പരാതി നൽകി.എറണാകുളം സ്വദേശി ആശിഷ് രഞ്ജിത്തിനെയാണ് കഴിഞ്ഞ മാസം 29-ാം തീയതി മുതൽ കാണാനില്ലെന്ന് മാതാവ് ബിന്ദു രഞ്ജിത്ത് പരാതി നൽകിയിരിക്കുന്നത്.
2023 ഒക്ടോബർ ഒമ്പതിനാണ് രഞ്ജിത്ത് ജോലി അന്വേഷിച്ച് വിസിറ്റിങ് വിസയിൽ ദുബായിലെത്തിയത്. എം.ബി.എ ഹോട്ടൽ മാനേജ്‌മെൻ്റ് ഹോസ്‌പിറ്റാലിറ്റി ബിരുദ ധാരിയാണ് രഞ്ജിത്ത്. വിസ കാലാവധി കഴിഞ്ഞതോടെ പുതുക്കുന്നതിനായി വീട്ടിൽനിന്ന് പണം അയച്ചുകൊടുത്തിരുന്നതായും മാതാവ് പറഞ്ഞു.
തുടർന്ന് ഇക്കഴിഞ്ഞ ഒക്ടോബർ 30ന് വീണ്ടും വിസ കാലാവധി തീരുന്നതിനാൽ പുതുക്കുന്നതിനായി സു ഹൃത്തിനൊപ്പം അജ്‌മാനിലേക്ക് പോകുന്നതായി 29-ാം തീയതി രഞ്ജിത്ത് വീട്ടിലേക്ക് വിളിച്ചറിയിച്ചിരുന്നു. അജ്‌മാനിൽ അൽനാഫ് എന്ന സ്ഥലത്താണ് താമസമെന്നും വിഡിയോ കോളിൽ അറിയിച്ചിരുന്നു.
എന്നാൽ, 29ന് ശേഷം മകനെ 0562605488 എന്ന നമ്പറിൽ ബന്ധപ്പെടാൻ ശ്രമിച്ചെങ്കിലും ഫോൺ സ്വിച്ച് ഓഫായിരുന്നതായി മാതാവ് പറഞ്ഞു. കഴിഞ്ഞ രണ്ടാഴ്‌ചയോളമായി പലയിടത്തും അന്വേഷിച്ചെങ്കിലും ക ണ്ടെത്താനായിട്ടില്ലെന്നും മാതാവ് നൽകിയ പരാതിയിൽ പറയുന്നു. കണ്ടെത്തുന്നവർ ബന്ധുക്കളെയോ പോലീസിനെയോ അറിയിക്കണമെന്ന് മാതാവ് അഭ്യർഥിച്ചു.
