ദുബായിലെ ഏറ്റവും പ്രധാനപ്പെട്ട റോഡ് വികസന പദ്ധതിയായ ഷിന്ദഗ കോറിഡോർ വികസനം ബർദുബായ് ഭാഗത്ത് പൂർത്തിയായി. ഈ ഭാഗത്തെ പദ്ധതിയുടെ അഞ്ചു ഘട്ടങ്ങളും പൂർത്തിയായതായി റോഡ് ഗതാഗത അതോറിറ്റി (RTA) പ്രസ്‌താവനയിൽ അറിയിച്ചു.
ദുബായിൽ ഗതാഗതം എളുപ്പമാക്കുന്ന പദ്ധതി വഴി യാത്രാസമയം 80 മിനിറ്റിൽനിന്ന് 12 മിനിറ്റായി കുറയുമെന്നും അധികൃതർ പ്രസ്‌താവനയിൽ വ്യക്തമാക്കി. പദ്ധതിയിലെ അഞ്ചാമത്തെയും അവസാനത്തെയും പാലം തുറന്നതോടെയാണ് പദ്ധതി പൂർത്തിയായത്.
ഈ പദ്ധതി പൂർത്തിയായതോടെ അൽ ഗർഹൂദ് പാലത്തിൽ നിന്ന് ഇൻഫിനിറ്റി പാലം വഴി പോർട്ട് റാഷിദിലേക്കും വാട്ടർ ഫ്രണ്ട് മാർക്കറ്റിലേക്കും തടസ്സമില്ലാത്ത ഗതാഗതം ഉറപ്പാക്കുന്നു.
ജുമൈറ സ്ട്രീറ്റിൽ നിന്ന് ഇൻഫിനിറ്റി ബ്രിഡ്ജിലേക്കുള്ള ഗതാഗതം ഇപ്പോൾ അഞ്ച് മിനിറ്റ് മാത്രമേ എടുക്കൂ, അതേസമയം ഇൻഫിനിറ്റി ബ്രിഡ്ജിൽ നിന്ന് അൽ മിന സ്ട്രീറ്റിലേക്കും ഡിസംബർ 2 സ്ട്രീറ്റ് കവലയിലെ അൽ വാസൽ റോഡിലേക്കും യാത്ര ചെയ്യാൻ അഞ്ച് മിനിറ്റ് എടുക്കും.
വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഹിസ് ഹൈനസ് ഷെയ്ഖ് മുഹമ്മദ് ബിൻ റാഷിദ് അൽ മക്തൂം, ദുബായ് കിരീടാവകാശിയും ദുബായ് എക്സിക്യൂട്ടീവ് കൗൺസിൽ ചെയർമാനുമായ എച്ച്.എച്ച്. ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം എന്നിവരുടെ നിർദ്ദേശങ്ങൾ പാലിച്ചാണ് പദ്ധതി നടപ്പിലാക്കുന്നതെന്ന് ആർ.ടി.എ ഡയറക്ടർ ജനറലും എക്സിക്യൂട്ടീവ് ഡയറക്ടർ ബോർഡ് ചെയർമാനുമായ മതാർ അൽ തായർ പറഞ്ഞു.
