ദുബായിൽ നിയുക്തമല്ലാത്ത സ്ഥലങ്ങളിൽ റോഡ് മുറിച്ചു കടക്കലും ഇ-സ്കൂട്ടർ നിയമലംഘനങ്ങളുമായി ബന്ധപ്പെട്ട് 2025 ലെ ആദ്യ അഞ്ച് മാസങ്ങളിൽ 13 പേർ മരിച്ചതായി ദുബായ് പോലീസ് റിപ്പോർട്ട് ചെയ്തു. ഇതിൽ ഒമ്പത് മരണങ്ങൾ നിയുക്തമല്ലാത്ത സ്ഥലങ്ങളിൽ റോഡ് മുറിച്ചത് മൂലമാണ് ഉണ്ടായിരിക്കുന്നത്. നാലെണ്ണം നിയമങ്ങൾ പാലിക്കാതെ ഇ-സ്കൂട്ടർ ഉപയോഗിച്ചത്‌ മൂലവുമാണ് ഉണ്ടായിരിക്കുന്നത്.
ഈ ദാരുണമായ സംഭവങ്ങളിൽ ഭൂരിഭാഗവും ഉയർന്ന ട്രാഫിക് ഉള്ള പ്രദേശങ്ങളിലാണ് സംഭവിച്ചതെന്ന് ദുബായ് പോലീസിലെ ഓപ്പറേഷൻസ് ആക്ടിംഗ് അസിസ്റ്റന്റ് കമാൻഡന്റ് മേജർ ജനറൽ സെയ്ഫ് മുഹൈർ അൽ മസ്രൂയി പറഞ്ഞു.അതേസമയം നിയുക്തമല്ലാത്ത സ്ഥലങ്ങളിൽ റോഡ് മുറിച്ചു കടന്നതിന് 28,027 പിഴകൾ അധികൃതർ പുറപ്പെടുവിച്ചിട്ടുണ്ട്, ഗതാഗത നിയമങ്ങൾ ലംഘിച്ചതിന് 15,029 ഇ-സ്കൂട്ടറുകളും കണ്ടുകെട്ടിയിട്ടുണ്ട്.
