യുഎഇയുടെ ഗാസയിലേക്കുള്ള എട്ടാമത്തെ സഹായ കപ്പലായ ഖലീഫയുടെ ചരക്ക് കയറ്റൽ ഇന്ന് ബുധനാഴ്ച അബുദാബിയിലെ ഖലീഫ തുറമുഖത്ത് ആരംഭിച്ചു. ചരക്കുകൾ കയറ്റൽ പൂർത്തിയായിക്കഴിഞ്ഞാൽ, ഗാസ മുനമ്പിലേക്ക് മാനുഷിക സഹായം എത്തിക്കുന്നതിനുള്ള തയ്യാറെടുപ്പിനായി കപ്പൽ ഈജിപ്തിലെ അൽ അരിഷ് തുറമുഖത്തേക്ക് യാത്ര തിരിക്കും.
ഗാസയിലെ ജനങ്ങളെ പിന്തുണയ്ക്കുന്നതിനുള്ള യുണൈറ്റഡ് അറബ് എമിറേറ്റ്‌സിന്റെ നിരന്തരമായ പ്രതിബദ്ധതയുടെ ഭാഗമാണ് ഈ സംരംഭം. സാധാരണക്കാരുടെ ദുരിതങ്ങൾ ലഘൂകരിക്കുന്നതിനും സുപ്രധാനമായ സാധനങ്ങൾ നൽകുന്നതിനും ലക്ഷ്യമിട്ടുള്ള മാനുഷിക, ദുരിതാശ്വാസ സഹായങ്ങളെല്ലാം ചരക്ക് കപ്പലിൽ ഉണ്ട്.
റെഡി-ടു-ഈറ്റ് ഫുഡ് പാഴ്‌സലുകൾ, കമ്മ്യൂണിറ്റി കിച്ചണുകളും ഫീൽഡ് ബേക്കറികളും പ്രവർത്തിപ്പിക്കുന്നതിനുള്ള സാധനങ്ങൾ തുടങ്ങി വിവിധതരം ഭക്ഷ്യവസ്തുക്കൾ ഈ കയറ്റുമതിയിൽ ഉണ്ട് . ടെന്റുകൾ, ദുരിതാശ്വാസ കിറ്റുകൾ, വസ്ത്രങ്ങൾ, മെത്തകൾ, കുടുംബങ്ങൾക്കും കുട്ടികൾക്കുമുള്ള ശുചിത്വ കിറ്റുകൾ എന്നിവയുൾപ്പെടെയുള്ള ഷെൽട്ടർ സാമഗ്രികളും കയറ്റുമതിയിൽ ഉൾപ്പെടുന്നുണ്ട്.
