യുഎഇയിൽ എല്ലാ പൊതു സ്കൂൾ അഡ്മിനിസ്ട്രേഷനുകൾക്കും സ്കൂൾ ബസുകളിൽ പ്രവേശിക്കുന്നതുമായി ബന്ധപ്പെട്ടുള്ള ഒരു നിർദ്ദേശം ഇപ്പോൾ യുഎഇ വിദ്യാഭ്യാസ മന്ത്രാലയം പുറപ്പെടുവിച്ചിട്ടുണ്ട്. ഇതനുസരിച്ച് രക്ഷിതാക്കളോ സന്ദർശകരോ സ്കൂൾ ബസുകളിൽ കയറുന്നതിന് വിലക്കുണ്ടാകും, ബസുകളിൽ പ്രവേശനം വിദ്യാർഥികൾക്കും സ്കൂൾ ജീവനക്കാർക്കും മാത്രമായിരിക്കും.
റൂട്ടുകൾ നിരീക്ഷിക്കുന്നതിനും വിദ്യാർത്ഥികളെ സംരക്ഷിക്കുന്നതിനായി രൂപകൽപ്പന ചെയ്ത സുരക്ഷാ പ്രോട്ടോക്കോളുകൾ ശക്തിപ്പെടുത്തുന്നതിനുമായി അധ്യയന വർഷം മുഴുവൻ പ്രവർത്തിക്കുന്ന നിരീക്ഷണ ക്യാമറകൾ സ്കൂൾ ബസുകളിൽ സജ്ജീകരിച്ചിട്ടുണ്ടെന്ന് സ്കൂളുകൾക്കും രക്ഷിതാക്കൾക്കും അയച്ച സർക്കുലറിൽ മന്ത്രാലയം എടുത്തുപറഞ്ഞു.
ബസ് റൂട്ടുകൾ, സുരക്ഷാ നിരീക്ഷണങ്ങൾ, ഗതാഗത സംബന്ധമായ ആശങ്കകൾ എന്നിവയെക്കുറിച്ചുള്ള എല്ലാ ആശയവിനിമയങ്ങളും സ്കൂൾ അഡ്മിനിസ്ട്രേഷനുകൾ വഴി മാത്രമായിരിക്കണം എന്നും നിർദ്ദേശത്തിൽ പറയുന്നു. ഈ കാര്യങ്ങളിൽ ബസ് ഡ്രൈവർമാരുമായോ സൂപ്പർവൈസർമാരുമായോ നേരിട്ട് ഇടപഴകരുതെന്ന് മാതാപിതാക്കളോട് പ്രത്യേകം അഭ്യർത്ഥിച്ചിട്ടുണ്ട്.
ഈ നിയന്ത്രണങ്ങളുടെ ഏതെങ്കിലും ലംഘനം കുട്ടികളുടെ സംരക്ഷണ നിയമങ്ങളുടെ ലംഘനമാകുമെന്നും ബാധകമായ ചട്ടങ്ങൾക്കും നടപടിക്രമങ്ങൾക്കും കീഴിലുള്ള നിയമപരമായ ഉത്തരവാദിത്തത്തിന് കാരണമായേക്കാമെന്നും മന്ത്രാലയം മുന്നറിയിപ്പ് നൽകി.
