അബുദാബി: വാഹനാപകടത്തെ തുടർന്ന് 14 കാരിയുടെ കിഡ്‌നി തകരാറിലായ സംഭവത്തിൽ 350,000 ദിർഹം നഷ്ടപരിഹാരം നൽകണമെന്ന് ഉത്തരവിട്ട് അബുദാബി സിവിൽ ഫാമിലി കോടതി. ഇലക്ട്രിക് സ്‌കൂട്ടറിൽ റോഡ് ക്രോസ് ചെയ്യുന്നതിനിടെയാണ് പെൺകുട്ടിയ്ക്ക് വാഹനാപകടം ഉണ്ടായത്. ഒരു സ്ത്രീ ഓടിച്ച വാഹനമാണ് പെൺകുട്ടിയെ ഇടിച്ചത്.
അപകടത്തിൽ പരിക്കേറ്റ പെൺകുട്ടിയ്ക്ക് വലത് കിഡ്‌നി പൂർണ്ണമായും നീക്കം ചെയ്യേണ്ടി വന്നു. വലത് അഡ്രിനൽ ഗ്രന്ഥിയും നീക്കം ചെയ്തു. പെൺകുട്ടിയുടെ അച്ഛനാണ് നഷ്ടപരിഹാരം ആവശ്യപ്പെട്ട് കേസ് ഫയൽ ചെയ്തത്. അശ്രദ്ധമായി വാഹനമോടിച്ചതാണ് അപകട കാരണമെന്ന് പെൺകുട്ടിയുടെ പിതാവ് കോടതിയിൽ വാദിച്ചു. എന്നാൽ പെൺകുട്ടിയുടെ ഭാഗത്ത് നിന്നുണ്ടായ വീഴ്ച്ചയാണ് അപകടത്തിന് കാരണമായതെന്നായിരുന്നു പ്രതിഭാഗത്തിന്റെ വാദം. എന്നാൽ, കോടതി ഈ വാദങ്ങളെല്ലാം തള്ളിക്കളഞ്ഞു നഷ്ടപരിഹാരം നൽകണമെന്ന് ഉത്തരവിടുകയായിരുന്നു.
