സൗദി അറേബ്യൻ വാണിജ്യ മന്ത്രാലയം വിപണിയിൽ നിന്ന് തിരിച്ചുവിളിച്ച പ്രമുഖ ബേബി ഫീഡിങ് ബോട്ടിൽ ബ്രാൻഡ് യു.എ.ഇയിലെ പ്രാദേശിക സൂപ്പർമാർക്കറ്റുകളിലോ ഫാർമസികളിലോ വിൽക്കുന്നില്ലെന്ന് പരിശോധനയിൽ വ്യക്തമായി.
‘NURSH 8oz Reusable Baby Bottles’ (Product No. B11654) എന്ന മോഡലിന്റെ 22 യൂണിറ്റ് ഉൽപ്പന്നങ്ങളാണ് സൗദി തിരിച്ചുവിളിച്ചത്. ഈ കുപ്പികളുടെ പുറംഭാഗത്തുള്ള സംരക്ഷണ പാളി അടർന്നുപോവുകയും, ഇവ ചെറിയ കഷണങ്ങളായി കുട്ടികളുടെ ഉള്ളിൽ ചെന്ന് ശ്വാസതടസ്സമോ (Choking Hazard) അപകടങ്ങളോ ഉണ്ടാക്കാൻ സാധ്യതയുണ്ടെന്ന കണ്ടെത്തലിനെ തുടർന്നാണ് നടപടി.
ദുബായിലെ പ്രമുഖ ഹൈപ്പർമാർക്കറ്റ് ശൃംഖലകളായ സ്പിന്നീസ് (Spinneys), അൽ മദീന (Al Madina), നൈറ്റ് ടു നൈറ്റ് (Night to Night) എന്നിവയും ദേരയിലെ പ്രമുഖ ഫാർമസികളും തങ്ങളുടെ സ്റ്റോക്കുകളിൽ ‘നർഷ്’ (NURSH) ബ്രാൻഡിന്റെ ഈ ഉൽപ്പന്നങ്ങൾ ലഭ്യമല്ലെന്ന് ഔദ്യോഗികമായി സ്ഥിരീകരിച്ചിട്ടുണ്ട്.
രക്ഷിതാക്കൾക്കുള്ള നിർദ്ദേശം: ഈ പ്രൊഡക്റ്റ് നമ്പറിലുള്ള കുപ്പികൾ യു.എ.ഇ വിപണിയിൽ നേരിട്ട് ലഭ്യമല്ലെങ്കിലും, വിദേശ യാത്രകൾക്കിടയിലോ അന്താരാഷ്ട്ര ഓൺലൈൻ സൈറ്റുകൾ വഴിയോ ആരെങ്കിലും ഇത് വാങ്ങിയിട്ടുണ്ടെങ്കിൽ ഉപയോഗം ഉടനടി നിർത്തണം. റീഫണ്ടിനോ പകരം സംവിധാനത്തിനോ വേണ്ടി നിർമ്മാതാക്കളുമായി ബന്ധപ്പെടാനും നിർദ്ദേശമുണ്ട്.
