അബുദാബി എമിറേറ്റിലുടനീളം അസ്ഥിരമായ കാലാവസ്ഥ തുടരുന്ന പശ്ചാത്തലത്തിൽ, അബുദാബി സിറ്റി മുൻസിപ്പാലിറ്റി എല്ലാ പാർക്കുകളും വിനോദ കേന്ദ്രങ്ങളും അഫിലിയേറ്റഡ് ബീച്ചുകളും താൽക്കാലികമായി അടയ്ക്കുകയും പരിപാടികൾ നിർത്തിവെക്കുകയും ചെയ്തു.
അബുദാബിയുടെ വിവിധ ഭാഗങ്ങളിൽ ലഭിച്ച കനത്ത മഴയെ തുടർന്ന് പൊതുജനങ്ങളുടെ സുരക്ഷ ഉറപ്പാക്കുന്നതിനും മുൻകരുതൽ നടപടിയുടെ ഭാഗമായുമാണ് ഈ തീരുമാനം കൈക്കൊണ്ടതെന്ന് മുൻസിപ്പാലിറ്റി അറിയിച്ചു.
മഴയും മാറിക്കൊണ്ടിരിക്കുന്ന കാലാവസ്ഥയും കണക്കിലെടുത്ത് ജാഗ്രത പാലിക്കണമെന്നും, താഴ്വരകളും (wadis) വെള്ളക്കെട്ടുള്ള പ്രദേശങ്ങളും ഉൾപ്പെടെയുള്ള അപകടസാധ്യതയുള്ള സ്ഥലങ്ങൾ ഒഴിവാക്കണമെന്നും അബുദാബി സിവിൽ ഡിഫൻസ് മുന്നറിയിപ്പ് നൽകി.
മഴയുള്ള കാലാവസ്ഥ കാരണം സ്വൈഹാൻ-നാഹെൽ, അൽ ഖസ്ന-റെമ, ഉം അൽ ഓഷ്-അൽ റസീൻ, അൽ ഫയാ-അൽ ഖാത്തിം തുടങ്ങിയ നിരവധി പ്രധാന റോഡുകളിൽ വേഗപരിധി മണിക്കൂറിൽ 80 കിലോമീറ്ററായി കുറച്ചുകൊണ്ട് അബുദാബി പൊലീസ് സ്പീഡ് റിഡക്ഷൻ സിസ്റ്റം സജ്ജമാക്കിയിരുന്നു.
വെള്ളിയാഴ്ച എമിറേറ്റിന്റെ വിവിധ ഭാഗങ്ങളിൽ പെയ്ത മഴയും മേഘാവൃതമായ ആകാശവും തണുത്ത കാലാവസ്ഥയും നിറഞ്ഞ അന്തരീക്ഷത്തിലാണ് ആളുകൾ വാരാന്ത്യത്തിലേക്ക് കടന്നത്.
വെള്ളിയാഴ്ച ഉച്ചകഴിഞ്ഞ് കിഴക്കൻ, തെക്കൻ മേഖലകളിൽ മഴമേഘങ്ങൾ രൂപപ്പെടാനും മഴ പെയ്യാനും സാധ്യതയുണ്ടെന്ന് യു.എ.ഇ ദേശീയ കാലാവസ്ഥാ കേന്ദ്രം മുൻകൂട്ടി പ്രവചിച്ചിരുന്നു.
അബുദാബി ഉൾപ്പെടെ രാജ്യത്തിന്റെ വിവിധ ഭാഗങ്ങളിൽ പെയ്ത മിതമായതും കനത്തതുമായ മഴയുടെ ദൃശ്യങ്ങൾ യു.എ.ഇ ആസ്ഥാനമായുള്ള കാലാവസ്ഥാ അക്കൗണ്ടായ ‘സ്റ്റോം സെന്റർ’ (Storm Centre) പങ്കുവെച്ചിട്ടുണ്ട്.
