ഉഗാണ്ഡയിൽ (Uganda) എബോള (Ebola) രോഗബാധ തടഞ്ഞതിനെ തുടർന്ന്, അവിടുത്തെ പൗരന്മാർക്ക് 2026 ജൂണിൽ ഏർപ്പെടുത്തിയിരുന്ന യാത്രാ-പ്രവേശന നിയന്ത്രണങ്ങളിൽ യു.എ.ഇ ഇളവുകൾ പ്രഖ്യാപിച്ചു. നാഷണൽ എമർജൻസി ക്രൈസിസ് ആൻഡ് ഡിസാസ്റ്റർ മാനേജ്മെന്റ് അതോറിറ്റിയും (NCEMA), ആരോഗ്യ മന്ത്രാലയവും (MoHAP), ഫെഡറൽ അതോറിറ്റി ഫോർ ഐഡന്റിറ്റി, സിറ്റിസൺഷിപ്പ്, കസ്റ്റംസ് ആൻഡ് പോർട്ട് സെക്യൂരിറ്റിയും (ICP) സംയുക്തമായാണ് ഈ തീരുമാനം അറിയിച്ചത്.
അതേസമയം, ഡെമോക്രാറ്റിക് റിപ്പബ്ലിക് ഓഫ് കോംഗോ, സൗത്ത് സുഡാൻ എന്നീ രാജ്യങ്ങളിലെ പൗരന്മാർക്കുള്ള താൽക്കാലിക നിയന്ത്രണങ്ങൾ നിലവിൽ തുടരുമെന്നും അധികൃതർ വ്യക്തമാക്കി.
ഉഗാണ്ഡയിൽ എബോള രോഗബാധയുടെ അന്താരാഷ്ട്ര നിരീക്ഷണ കാലയളവ് പൂർത്തിയാവുകയും രോഗവ്യാപനം അവസാനിക്കുകയും ചെയ്തതോടെയാണ് 2026 ജൂൺ മുതൽ നിലവിലുണ്ടായിരുന്ന മുൻകരുതൽ പ്രവേശന നിയന്ത്രണങ്ങൾ യു.എ.ഇ നീക്കിയത്.
നിലവിലെ ആരോഗ്യ സാഹചര്യങ്ങൾ മുൻനിർത്തി ഡെമോക്രാറ്റിക് റിപ്പബ്ലിക് ഓഫ് കോംഗോ (Democratic Republic of the Congo), സൗത്ത് സുഡാൻ (South Sudan) എന്നിവിടങ്ങളിൽ നിന്നുള്ള യാത്രക്കാർക്കുള്ള പ്രവേശന നിയന്ത്രണങ്ങൾ മാറ്റമില്ലാതെ തുടരും.
അന്താരാഷ്ട്ര തലത്തിലെയും പ്രാദേശിക തലത്തിലെയും എബോള വ്യാപന സാഹചര്യങ്ങൾ യു.എ.ഇ സൂക്ഷ്മമായി നിരീക്ഷിച്ചു വരികയാണെന്നും എൻ.സി.ഇ.എം.എ (NCEMA) വ്യക്തമാക്കി.
പൊതുജനാരോഗ്യം സംരക്ഷിക്കുന്നതിനൊപ്പം രോഗവ്യാപന ഭീഷണിയുടെ തോത് കൃത്യമായി വിലയിരുത്തി ആവശ്യമായ സുരക്ഷാ മാനദണ്ഡങ്ങൾ സമയാസമയങ്ങളിൽ പരിഷ്കരിക്കുമെന്നും അതോറിറ്റി ഉറപ്പുനൽകി.
