യൂഎഇയിലെ വിവിധ ഭാഗങ്ങളിൽ ഇന്ന് ഒക്ടോബർ 6 ചൊവ്വാഴ്ച രാവിലെ ശക്തമായ മൂടൽമഞ്ഞിനെ തുടർന്ന് പൊലീസും ദേശീയ കാലാവസ്ഥാ കേന്ദ്രവും (NCM) ജാഗ്രതാ നിർദ്ദേശം പുറപ്പെടുവിച്ചു. കുറഞ്ഞ കാഴ്ചാപരിധി നിലനിൽക്കുന്നതിനാൽ വാഹനമോടിക്കുന്നവർ അതീവ ജാഗ്രത പാലിക്കണമെന്ന് അധികൃതർ ഓർമ്മിപ്പിച്ചു.
അൽ ഐനിലെ അൽ ശുവൈബ്, രക്തേഴ്‌സ് സ്ട്രീറ്റ്, ഷെയ്ഖ് മുഹമ്മദ് ബിൻ സായിദ് റോഡ്, റാസൽഖൈമയിലെ എമിറേറ്റ്‌സ് റോഡ്, ദുബായുടെ വിവിധ ഭാഗങ്ങൾ എന്നിവയുൾപ്പെടെ രാജ്യത്തിന്റെ പലേടത്തും രാവിലെ കനത്ത മൂടൽമഞ്ഞ് അനുഭവപ്പെട്ടു.
റോഡ് സുരക്ഷ ബോധവൽക്കരണത്തിൽ തുടങ്ങുന്നുവെന്ന് ഓർമ്മിപ്പിച്ച പൊലീസ്, യാത്രാവേളകളിൽ ഡ്രൈവർമാർ കൃത്യമായ സുരക്ഷാ മാർഗ്ഗനിർദ്ദേശങ്ങൾ പാലിക്കണമെന്ന് അഭ്യർത്ഥിച്ചു.
ഉയർന്ന ആർദ്രതയും (Humidity) അന്തരീക്ഷത്തിലെ താപനിലയിലുള്ള വ്യതിയാനവുമാണ് രാജ്യത്ത് വ്യാപകമായി മൂടൽമഞ്ഞ് രൂപപ്പെടാൻ കാരണം.
ഇന്ന് ഉച്ചയ്ക്ക് ശേഷം അന്തരീക്ഷത്തിൽ കൺവെക്റ്റീവ് മേഘങ്ങൾ രൂപപ്പെടാൻ സാധ്യതയുള്ളതിനാൽ കിഴക്കൻ, തെക്കൻ പ്രദേശങ്ങളിൽ മഴ ലഭിച്ചേക്കുമെന്ന് ദേശീയ കാലാവസ്ഥാ കേന്ദ്രം അറിയിച്ചു.
മഴ മുന്നറിയിപ്പുണ്ടെങ്കിലും രാജ്യത്തെ ഉയർന്ന താപനില 44 ഡിഗ്രി സെൽഷ്യസ് വരെ രേഖപ്പെടുത്താൻ സാധ്യതയുണ്ട്.
കാറ്റ് മിതമായ തോതിലായിരിക്കുമെങ്കിലും ചില സമയങ്ങളിൽ വേഗത പ്രാപിക്കാനും പൊടിപടലങ്ങൾ ഉയരാനും (Blowing dust) സാധ്യതയുണ്ട്. പൊതുവെ തെളിഞ്ഞതോ ഭാഗികമായി മേഘാവൃതമായതോ ആയ കാലാവസ്ഥയായിരിക്കും അനുഭവപ്പെടുക.
