യുഎഇയിൽ കിഴക്കൻ മേഖലകളിൽ കനത്ത മഴ; മണിക്കൂറിൽ 50 km വേഗതയിൽ കാറ്റിന് സാധ്യതയെന്ന് കാലാവസ്ഥാ നിരീക്ഷണ കേന്ദ്രം
യു.എ.ഇയുടെ കിഴക്കൻ, തെക്കൻ മേഖലകളിൽ ബുധനാഴ്ച ഉച്ചയോടെ ശക്തമായ മഴ ലഭിച്ചു. രാജ്യത്ത് മഴമേഘങ്ങൾ രൂപപ്പെടാൻ സാധ്യതയുണ്ടെന്ന് നാഷണൽ സെന്റർ ഓഫ് മെറ്റീരിയോളജി (NCM) നേരത്തെ മുന്നറിയിപ്പ് നൽകിയിരുന്നു.
ചില കിഴക്കൻ, തെക്കൻ പ്രദേശങ്ങളിൽ കാർമേഘങ്ങൾ (Cumulonimbus clouds) രൂപപ്പെടാനും മഴയ്ക്കൊപ്പം ശക്തമായ കാറ്റിനും സാധ്യതയുണ്ട്.
മഴയോടനുബന്ധിച്ച് വീശിയടിക്കുന്ന കാറ്റിന് മണിക്കൂറിൽ 50 കിലോമീറ്റർ വരെ വേഗതയുണ്ടാകുമെന്നും, ഇത് പൊടിക്കാറ്റിനും ദൃശ്യപരത കുറയുന്നതിനും കാരണമായേക്കാമെന്നും അധികൃതർ അറിയിച്ചു. ബുധനാഴ്ച രാത്രി 10 മണി വരെ ഈ ജാഗ്രതാ നിർദ്ദേശം നിലവിലുണ്ടാകും.
ഫുജൈറയുടെ വിവിധ ഭാഗങ്ങളിൽ മഴ പെയ്തതായും റോഡുകൾ നനഞ്ഞതായും കാലാവസ്ഥ നിരീക്ഷണ ഗ്രൂപ്പായ ‘സ്റ്റോം സെന്റർ’ പുറത്തുവിട്ട ദൃശ്യങ്ങൾ വ്യക്തമാക്കുന്നു. താപനിലയിൽ കാര്യമായ കുറവും അനുഭവപ്പെട്ടിട്ടുണ്ട്.
