യുഎഇയിൽ ഈ വർഷം വീണ്ടും റമദാൻ ടെന്റുകൾക്ക് അനുമതി നൽകി കൊണ്ട് റമദാൻ മാസത്തിൽ പാലിക്കേണ്ട പുതുക്കിയ കോവിഡ്-19 മാർഗ്ഗനിർദ്ദേശങ്ങളും നാഷണൽ എമർജൻസി ആൻഡ് ക്രൈസിസ് മാനേജ്‌മെന്റ് അതോറിറ്റി (NCEMA) ഇന്ന് തിങ്കളാഴ്ച പ്രഖ്യാപിച്ചു.
ഇതനുസരിച്ച് ഇഫ്താർ ടെന്റുകൾ സന്ദർശിക്കുന്നതുമായി ബന്ധപ്പെട്ട നിയമങ്ങളും സാമൂഹിക അകലം പാലിക്കുന്നതിനുള്ള മാർഗ്ഗനിർദ്ദേശങ്ങളും ഇപ്രകാരമാണ്.
ഇഫ്താർ ടെന്റുകളിൽ പ്രവേശിക്കാൻ ഗ്രീൻ പാസും മാസ്കും നിർബന്ധമാണ്. ഓരോ റംസാൻ ടെന്റുകളിലും ആളുകളുടെ പ്രവേശനവും പുറത്തുകടക്കലും നിയന്ത്രിക്കുന്നതിന് സുരക്ഷാ ഗാർഡുകളെയോ സന്നദ്ധപ്രവർത്തകരെയോ ബന്ധപ്പെട്ടവർ വിന്യസിക്കേണ്ടതുണ്ട്.
ഇഫ്താർ ടെന്റുകൾ സ്ഥാപിക്കുന്നതിന് എമിറേറ്റ്‌സ് റെഡ് ക്രസന്റിൽ നിന്ന് മുൻകൂർ അനുമതി വാങ്ങണമെന്ന് NCEMA അറിയിച്ചു.
ഓരോ എമിറേറ്റിലെയും പ്രാദേശിക എമർജൻസി ക്രൈസിസ് ആൻഡ് ഡിസാസ്റ്റർ മാനേജ്‌മെന്റ് കമ്മിറ്റികൾക്കായിരിക്കും ഏതെങ്കിലും ഇഫ്താർ ടെന്റുകൾ സ്ഥാപിക്കുന്നതിന് അനുമതി നൽകുന്നതിനോ നിരസിക്കുന്നതിനോ ഉള്ള ചുമതല. ഇആർസിയുമായി ഏകോപിപ്പിച്ച് ഓരോ ടെന്റിലും അനുവദിക്കുന്ന ആളുകളുടെ എണ്ണം തീരുമാനിക്കാനുള്ള ഉത്തരവാദിത്തവും അവർക്കായിരിക്കും.
ഓരോ എമിറേറ്റിലെയും ലോക്കൽ എമർജൻസി ക്രൈസിസ് ആൻഡ് ഡിസാസ്റ്റർ മാനേജ്‌മെന്റ് കമ്മിറ്റികളാണ് ഓരോ ടെന്റിന്റെയും പ്രവർത്തന ശേഷി തീരുമാനിക്കേണ്ടത്, ഓരോ വ്യക്തിയും മറ്റൊരാളും തമ്മിൽ 1 മീറ്റർ സുരക്ഷിതമായ അകലം പാലിക്കണം.
മാസ്‌ക് ധരിക്കുക, ശാരീരിക അകലം പാലിക്കുക, കൈകൾ അണുവിമുക്തമാക്കുക എന്നിവ പാലിക്കാൻ ആളുകളോട് നിർദ്ദേശിക്കുമ്പോഴും എല്ലാ ടെന്റുകളിലും ഫെയ്‌സ് മാസ്‌കുകളും സാനിറ്റൈസറുകളും നൽകേണ്ടതുണ്ട്.
തിരക്ക് ഒഴിവാക്കാൻ ഇഫ്താറിന് (മഗ്‌രിബ് പ്രാർത്ഥന) രണ്ട് മണിക്കൂർ മുമ്പ് മാത്രമേ ഇഫ്താർ ടെന്റുകൾ തുറക്കൂ.
ഇഫ്താർ ടെന്റുകൾ കുടയുടെ ആകൃതിയിൽ ടെന്റുകൾ രൂപകല്പന ചെയ്യേണ്ടത് നിർബന്ധമാണ്, അതായത് എല്ലാ വശങ്ങളിൽ നിന്നും തുറന്നിരിക്കണം അല്ലെങ്കിൽ പുറത്തെ ഉയർന്ന താപനിലയും ആവശ്യമായ സുരക്ഷാ ചട്ടങ്ങളും കണക്കിലെടുത്ത് എയർകണ്ടീഷൻ ചെയ്തിരിക്കണം.
ഒറ്റത്തവണ ഉപയോഗിക്കാവുന്ന ടേബിൾക്ലോത്ത് നിർബന്ധമാണെന്ന് അതോറിറ്റി വ്യക്തമാക്കി. ടെന്റ് ഹോസ്റ്റുകൾ ഡിസ്പോസിബിൾ പ്ലേറ്റുകൾ, ഗ്ലാസുകൾ, സ്പൂണുകൾ എന്നിവയും ഉപയോഗിക്കണം. ഭക്ഷണം കഴിക്കുമ്പോഴോ കുടിക്കുമ്പോഴോ ഒഴികെ ബാക്കി എല്ലാ സമയത്തും മാസ്‌ക് നിർബന്ധമാണ്.
കോവിഡ് വ്യാപനം കർശനമായി തടയുന്നതിനായി കഴിഞ്ഞ വർഷത്തെ റമദാനിൽ യുഎഇയിൽ ഇഫ്താർ ടെന്റുകൾക്ക് അനുമതിയില്ലായിരുന്നു.
