മാധ്യമങ്ങൾ, പ്രസിദ്ധീകരണങ്ങൾ, ഓൺലൈൻ കണ്ടന്റ് എന്നിവയെ നിയന്ത്രിക്കുന്ന ഒരു പുതിയ ഫെഡറൽ നിയമം ഈ വർഷം യുഎഇയിൽ അവതരിപ്പിക്കുമെന്ന് സാംസ്കാരിക, യുവജന മന്ത്രി നൂറ ബിൻത് മുഹമ്മദ് അൽ കാബി ഫെഡറൽ നാഷണൽ കൗൺസിലിനോട് (FNC) പറഞ്ഞു.
പ്രതിസന്ധി ഘട്ടങ്ങളിൽ, ലൈസൻസുള്ള മാധ്യമ പ്രവർത്തനങ്ങളുടെ ഉള്ളടക്കം ഓൺലൈനിൽ നിരീക്ഷിക്കുന്നതിനെക്കുറിച്ച് FNC അംഗം, ഉബൈദ് ഖൽഫാൻ അൽ-ഗൗൾ അൽ-സലാമിയുടെ ചോദ്യത്തോട് പ്രതികരിച്ചപ്പോഴായിരുന്നു മന്ത്രി ഇക്കാര്യം അറിയിച്ചത്.
മാധ്യമങ്ങളും പ്രസിദ്ധീകരണങ്ങളും സംബന്ധിച്ച് 1980-ലെ 15-ാം നമ്പർ ഫെഡറൽ നിയമം ഭേദഗതി ചെയ്യുന്നതിനുള്ള പുതിയ കരട് നിയമം തങ്ങളുടെ മന്ത്രാലയം തയ്യാറാക്കിക്കൊണ്ടിരിക്കുകയാണെന്നും, വർധിച്ചുവരുന്ന സാങ്കേതിക മാറ്റങ്ങൾക്ക് അനുസൃതമായി ഈ നിയമങ്ങൾ കൊണ്ടുവരുമെന്നും മന്ത്രി പറഞ്ഞു. പ്രിന്റ്, വിഷ്വൽ, ഇലക്ട്രോണിക് മീഡിയ ഉള്ളടക്കം ഉൾപ്പെടെ രാജ്യത്ത് പുറത്തിറക്കിയ എല്ലാ പ്രസിദ്ധീകരണങ്ങളും പിന്തുടരുന്നതും നിരീക്ഷിക്കുന്നതും ഈ ടാസ്ക്കുകളിൽ ഉൾപ്പെടും.