500 ഓളം ഹെവി വാഹനങ്ങൾ ഉൾക്കൊള്ളാൻ ശേഷിയുള്ള ട്രക്കുകൾക്കായി ദുബായിൽ മൂന്ന് പുതിയ റെസ്റ്റ് സ്റ്റേഷനുകൾ വികസിപ്പിക്കുമെന്ന് ദുബായിലെ റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (RTA) അറിയിച്ചു.
ഡ്രൈവർമാർക്കുള്ള റെസിഡൻഷ്യൽ ക്വാർട്ടേഴ്‌സ്, മെയിന്റനൻസ് വർക്ക്‌ഷോപ്പുകൾ, റെസ്റ്റോറന്റുകൾ, അഡ്മിനിസ്‌ട്രേറ്റീവ് കെട്ടിടങ്ങൾ, പ്രാർത്ഥനാ മുറികൾ, ഡ്രൈവർ പരിശീലന കേന്ദ്രങ്ങൾ, ക്ലിനിക്കുകൾ, ഫാർമസികൾ, എക്‌സ്‌ചേഞ്ച് ഷോപ്പുകൾ, അലക്കുശാലകൾ, മറ്റ് പിന്തുണാ സേവനങ്ങൾ എന്നിവ ഉൾപ്പെടെയുള്ള സേവനങ്ങളുടെ ഒരു നിര തന്നെ പുതിയ സ്റ്റേഷനുകളിൽ ഉണ്ടാവും.
ദുബായിലെ റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (RTA) അബുദാബി നാഷണൽ ഓയിൽ കമ്പനിക്ക് ഒരു കരാറും 226,000 ചതുരശ്ര മീറ്ററിൽ പരന്നുകിടക്കുന്ന സംയോജിത ട്രക്ക് റെസ്റ്റ് സ്റ്റോപ്പുകളുടെ നിർമ്മാണത്തിനായി അൽമുതകമേല വെഹിക്കിൾ ടെസ്റ്റിംഗ് ആൻഡ് രജിസ്‌ട്രേഷനുമായി രണ്ട് കരാറുകളും നൽകി.
ആർടിഎ ഫീൽഡ് സർവേകൾ നടത്തുകയും ദുബായിലെ ട്രക്ക് നീക്കത്തെക്കുറിച്ച് സമഗ്രമായ പഠനം നടത്തുകയും ചെയ്തിട്ടുണ്ട്. ട്രക്ക് ചലനത്തിന്റെ പ്രവചന മാതൃക വികസിപ്പിക്കുകയും ഡ്രൈ പോർട്ടുകളുടെയും ചരക്ക് ശേഖരണ വിതരണ കേന്ദ്രങ്ങളുടെയും ആവശ്യകത വിലയിരുത്തുകയും ചെയ്തു.
