യുഎഇയിൽ പെയ്ത കനത്ത മഴയിലുണ്ടായ വെള്ളക്കെട്ടിലൂടെ സഞ്ചരിച്ച നിരവധി വാഹനങ്ങൾക്ക് എഞ്ചിൻ പ്രശ്‌നങ്ങൾ നേരിട്ടതായി റിപ്പോർട്ടുകൾ. കാർ റിപ്പയർ ഷോപ്പുകളിലെത്തുന്ന ഉപഭോക്താക്കളിൽ 200% വരെ വർധനവ് റിപ്പോർട്ട് ചെയ്തിട്ടുണ്ടെന്ന് ഖലീജ് ടൈംസ് റിപ്പോർട്ട് ചെയ്തു.
തുടർച്ചയായ മൂന്നാം ദിവസവും യുഎഇയിൽ പെയ്ത കനത്ത മഴ നിവാസികളുടെ പതിവ് ദിനചര്യകൾ താളം തെറ്റിച്ചു. ചോർന്നൊലിക്കുന്ന മേൽക്കൂരകൾ മുതൽ കാർ എഞ്ചിൻ പ്രശ്‌നങ്ങളും മെഡിക്കൽ ആശങ്കകളും വരെ, അടിയന്തരാവസ്ഥകൾ ഒന്നിനുപുറകെ ഒന്നായി ഉയർന്നുവന്നു.
നിരവധി കാർ റിപ്പയർ ഷോപ്പുകൾ നിറഞ്ഞതായും അറിയുന്നു. ഒരു ദിവസം അഞ്ച് മുതൽ ഏഴ് വരെ ഉപഭോക്താക്കളെ കണ്ടിരുന്ന ദുബായിലെ ചില മെക്കാനിക്കുകൾ കഴിഞ്ഞ മൂന്ന് ദിവസമായി ദിവസേന 10 മുതൽ 15 വരെ സർവീസ് നടത്തി. പരാതിയുമായി എത്തുന്നവരുടെ എണ്ണത്തിൽ 100 മുതൽ 200 ശതമാനം വരെ വർധനവുണ്ടായതായി ഗാരേജ് ഉടമകൾ പറയുന്നു. വെള്ളക്കെട്ടിലൂടെ വാഹനമോടിച്ച ശേഷം ഷോർട്ട് സർക്യൂട്ടുകൾ, ഹെഡ്‌ലൈറ്റുകൾ തകരാറിലാകൽ തുടങ്ങിയ പ്രശ്‌നങ്ങൾക്ക് പലരും സഹായം തേടിയിരുന്നു.
ഞായറാഴ്ചയോ തിങ്കളാഴ്ചയോ മഴ പെയ്യുമെന്ന് ദേശീയ കാലാവസ്ഥാ കേന്ദ്രം പ്രവചിച്ചിട്ടില്ലെങ്കിലും മൂടൽമഞ്ഞ് രൂപപ്പെടാൻ സാധ്യതയുണ്ടെന്ന് അറിയിച്ചു. രണ്ട് ദിവസങ്ങളിലും ഭാഗികമായി മേഘാവൃതമായിരിക്കും.
