ഷാർജ എമിറേറ്റിലെ പെയ്ഡ് സോണുകളിൽ പാർക്ക് ചെയ്‌തിരിക്കുന്നവർ വാഹനങ്ങൾക്കകത്തിരുന്നാലും പാർക്കിംഗ് ഫീസ് അടയ്ക്കുന്നതിൽ നിന്നും ഒഴിവാകാനാവില്ലെന്ന് ഷാർജ മുനിസിപ്പാലിറ്റി മുന്നറിയിപ്പ് നൽകി.
യുഎഇയിലെ വാഹനമോടിക്കുന്നവർ തങ്ങളുടെ വാഹനങ്ങൾ പെയ്ഡ് സോണുകളിൽ പാർക്ക് ചെയ്യുകയും പണം നൽകാതെ ഉള്ളിൽ കാത്തിരിക്കുകയും ചെയ്യുന്നത് ഇപ്പോൾ വളരെ സാധാരണമായ ഒരു സമ്പ്രദായമായി മാറിയിട്ടുണ്ട്. ഒരു ഫോൺ കോൾ ചെയ്യാനോ ആരെയെങ്കിലും കാത്തിരിക്കാനോ ആണ് ചിലർ ഇങ്ങനെ പെയ്ഡ് സോണുകളിൽ പാർക്ക് ചെയ്യുന്നത്.
”വാഹനത്തിൽ ഇരുന്നാലും പാർക്കിംഗ് ഫീസ് അടയ്ക്കുന്നതിൽ നിന്ന് ഡ്രൈവറെ ഒഴിവാക്കില്ല. ഡ്രൈവർമാർ പാർക്കിംഗ് സ്ഥലം കൈവശപ്പെടുത്തുകയോ ഉപയോഗിക്കുകയോ ചെയ്യുന്നിടത്തോളം പാർക്കിംഗ് ഫീസ് നൽകണം ” ഷാർജ മുനിസിപ്പാലിറ്റി ഒരു സോഷ്യൽ മീഡിയ പോസ്റ്റിൽ പറഞ്ഞു.
പാർക്കിംഗ് മീറ്ററുകൾ, SMS, ഡിജിറ്റൽ ഷാർജ ആപ്പ് എന്നിവയുൾപ്പെടെ ലഭ്യമായ ഏതെങ്കിലും പേയ്‌മെന്റ് ചാനലുകൾ വഴി “പാർക്കിംഗ് ആരംഭിച്ച് 10 മിനിറ്റിനുള്ളിൽ” ഡ്രൈവർമാർ പാർക്കിംഗ് ഫീസ് അടയ്ക്കണം. പാർക്കിങ്ങിന് പണം നൽകിയില്ലെങ്കിൽ 150 ദിർഹം പിഴ നൽകേണ്ടി വരും . നിശ്ചിത സമയത്തിനപ്പുറം താമസിച്ചാൽ 100 ദിർഹമാണ് പിഴ. വികലാംഗർക്കായി റിസർവ് ചെയ്ത സ്ഥലങ്ങളിൽ പാർക്ക് ചെയ്യുന്നത് ഗുരുതരമായ കുറ്റമാണ്, അതിന് 1,000 ദിർഹമാണ് പിഴ.
“ഉപയോക്താക്കൾക്ക് പാർക്കിംഗ് സബ്‌സ്‌ക്രിപ്‌ഷനുകളും ലഭിക്കും, ഇത് വാഹനമോടിക്കുന്നവരെ നഗരത്തിന്റെ എല്ലാ പ്രദേശങ്ങളിലും അല്ലെങ്കിൽ അവർ തിരഞ്ഞെടുത്ത രണ്ട് പ്രത്യേക പ്രദേശങ്ങളിലും പാർക്ക് ചെയ്യാൻ അനുവദിക്കുന്നു,” മുനിസിപ്പാലിറ്റി പറഞ്ഞു.
