ലോകമെമ്പാടും സഞ്ചരിക്കുന്ന ഫ്ലോട്ടിംഗ് ബുക്ക് ഫെയർ ‘ലോഗോസ് ഹോപ്പ് ‘ ഇപ്പോൾ യുഎഇയിൽ തിരിച്ചെത്തിയിട്ടുണ്ട് . 10 വർഷത്തിന് ശേഷമാണ് ‘ലോഗോസ് ഹോപ്പ് ‘ഇപ്പോൾ വീണ്ടും യുഎഇ യിലെ പുസ്തകപ്രേമികളെ ആവേശം കൊള്ളിക്കാൻ എത്തിയിരിക്കുന്നത്.
ലോകമെമ്പാടുമുള്ള സന്നദ്ധപ്രവർത്തകർ നിയന്ത്രിക്കുന്നതും 5,000-ലധികം പുസ്തകങ്ങൾ നിറഞ്ഞതുമായ വലിയ കപ്പൽ ”ലോഗോസ് ഹോപ്പ് ” വായനാ സ്നേഹം പ്രോത്സാഹിപ്പിക്കുന്നതിനായി എല്ലാ വർഷവും ഏഴ് കടലുകൾ സഞ്ചരിക്കുന്നുണ്ട്. അവസാനമായി 2013 ൽ ഇവിടെ എത്തിയപ്പോൾ 5000-ത്തിലധികം ഇംഗ്ലീഷ്, അറബിക് പുസ്തകങ്ങൾ കൊണ്ടുവന്നിരുന്നു.
യുഎഇയിലെ റാസൽഖൈമയിലെ തുറമുഖത്താണ് ഇത്തവണ ആദ്യം എത്തിയിരിക്കുന്നത്. ഏപ്രിൽ 11 മുതൽ ഏപ്രിൽ 16 വരെ റാസൽഖൈമയിലുണ്ടാകും, ഏപ്രിൽ 18 മുതൽ 23 വരെ ദുബായിലുണ്ടാകും, മെയ് 17 മുതൽ ജൂൺ 4 വരെ അബുദാബിയിലായിരിക്കും. ”ലോഗോസ് ഹോപ്പ് ” സന്ദർശകർക്ക് ടിക്കറ്റ് ഓൺ-സൈറ്റിൽ വാങ്ങാവുന്നതാണ്. 15 ദിർഹമാണ് നിരക്ക്.
സമീപകാല റിലീസുകൾ മുതൽ ഫിക്ഷൻ, നോൺ-ഫിക്ഷൻ, ബാലസാഹിത്യങ്ങൾ എന്നിവയിലെ കാലാതീതമായ കൃതികൾ വരെയുള്ള വിപുലമായ പുസ്തകങ്ങൾ പര്യവേക്ഷണം ചെയ്യാനും വാങ്ങാനും ഓരോ സ്റ്റോപ്പിലും കപ്പലിൽ വരാൻ സന്ദർശകരെ ക്ഷണിക്കുന്നു.
