യുദ്ധത്തിൽ തകർന്ന ഗാസയിലുള്ള ഫലസ്തീനികൾക്കായി ദുരിതാശ്വാസ സാമഗ്രികൾ ശേഖരിക്കാനും സമാഹരിക്കാനുമായി യുഎഇ ഒരു മാനുഷിക കാമ്പയിൻ പ്രഖ്യാപിച്ചു
‘കംപാഷൻ ഫോർ ഗാസ’ (Compassion for Gaza) എന്ന് പേരിട്ടിരിക്കുന്ന ഈ കാമ്പയിനിലൂടെ ചാരിറ്റബിൾ സ്ഥാപനങ്ങൾ, സന്നദ്ധ കേന്ദ്രങ്ങൾ, സ്വകാര്യ മേഖല, രാജ്യത്തെ മറ്റെല്ലാ സമൂഹങ്ങൾ, മാധ്യമങ്ങൾ എന്നിവയുടെ പങ്കാളിത്തത്തോടെ സഹായ പാക്കേജുകൾ ശേഖരിക്കുന്നതിനും സമാഹരിക്കുന്നതിനുമുള്ള കേന്ദ്രങ്ങൾ സ്ഥാപിക്കും.
ഗാസയിലെ പലസ്തീൻ കുട്ടികളോടും കുടുംബങ്ങളോടും ഐക്യദാർഢ്യം പ്രകടിപ്പിക്കാനും ഈ കാമ്പയിൻ ശ്രമിക്കുന്നു. ഈ കാരുണ്യ കാമ്പെയ്നിലൂടെ, ഏറ്റവും ദുർബലരായ വിഭാഗങ്ങളുടെ – പ്രത്യേകിച്ച് ഗാസ മുനമ്പിലെ ജനസംഖ്യയുടെ പകുതിയോളം വരുന്ന ഒരു ദശലക്ഷത്തിലധികം കുട്ടികളുടെ – കഷ്ടപ്പാടുകൾ ലഘൂകരിക്കാൻ യുഎഇ ലക്ഷ്യമിടുന്നു. അവർക്കും അവരുടെ അമ്മമാർക്കും ആരോഗ്യ സാമഗ്രികൾക്കും പൊതു ശുചിത്വ സാമഗ്രികൾക്കും പുറമേ അടിസ്ഥാന ആവശ്യങ്ങൾ നൽകണം.
എമിറേറ്റ്സ് റെഡ് ക്രസന്റ് അതോറിറ്റിയുടെ മേൽനോട്ടത്തിൽ ഈ വരുന്ന ഞായറാഴ്ച അബുദാബിയിൽ കാമ്പയിൻ ആരംഭിക്കും. മിന സായിദിലെ അബുദാബി പോർട്ട്സ് ഹാളിൽ രാവിലെ 9 മുതൽ വൈകിട്ട് 4 വരെയാണ് പരിപാടി. എമിറേറ്റ്സിന്റെ ബാക്കി ഭാഗങ്ങളിൽ മൊബിലൈസേഷനും കളക്ഷൻ പോയിന്റുകളും ഉടൻ സജ്ജീകരിക്കും.
പലസ്തീൻ ജനതയ്ക്ക് അടിയന്തര സഹായം നൽകുന്നതിന് യുഎഇ നടത്തുന്ന മാനുഷിക ശ്രമങ്ങളുടെ ഭാഗമായി ലോക ഭക്ഷ്യ പരിപാടിയുമായി സഹകരിച്ചും വിദേശകാര്യ മന്ത്രാലയത്തിന്റെയും കമ്മ്യൂണിറ്റി ഡെവലപ്മെന്റ് മന്ത്രാലയത്തിന്റെയും ഏകോപനത്തോടെയാണ് ഈ കാമ്പയിൻ ആരംഭിക്കുന്നത്.