പുതുവത്സര അവധിക്കാലത്ത് 2023 ഡിസംബർ 27 മുതൽ 2024 ജനുവരി 1 വരെ ദുബായിലെ വിമാനത്താവളം , റോഡ്, കടൽ മാർഗ്ഗങ്ങളിലൂടെ 1.2 മില്ല്യണിലധികം യാത്രക്കാർ യാത്ര ചെയ്തതായി ദുബായിലെ ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്സ് അഫയേഴ്സ് (GDRFA) പുറത്തുവിട്ട കണക്കുകൾ വ്യക്തമാക്കുന്നു.
2023 ഡിസംബർ 30 എന്ന ഒറ്റ ദിവസം കൊണ്ട് 224,380 യാത്രക്കാരാണ് യാത്ര ചെയ്തത്. ഈ കാലയളവിൽ ദുബായിലെ വിമാനത്താവളങ്ങളും കര, കടൽ തുറമുഖങ്ങളും കൈവരിച്ച ശ്രദ്ധേയമായ സ്ഥിതിവിവരക്കണക്കുകൾ നഗരത്തിന്റെ ആകർഷണീയതയെയും ലോകമെമ്പാടുമുള്ള വ്യക്തികളുടെ മികച്ച തിരഞ്ഞെടുപ്പെന്ന നിലയെയും അടിവരയിടുന്നതായി ജിഡിആർഎഫ്എ ഡയറക്ടർ ജനറൽ ലെഫ്റ്റനന്റ് ജനറൽ മുഹമ്മദ് അഹമ്മദ് അൽ മർറി ഊന്നിപ്പറഞ്ഞു. തങ്ങളുടെ പുതുവത്സര ആഘോഷ കേന്ദ്രമായി തിരഞ്ഞെടുത്ത ദശലക്ഷക്കണക്കിന് ആളുകൾക്കിടയിൽ ദുബായുടെ പ്രശസ്തിയിൽ അദ്ദേഹം അഭിമാനം പ്രകടിപ്പിച്ചു.
