യുഎഇയിലെ തങ്ങളുടെ ഓൺലൈൻ സ്റ്റോറുകളിൽ മാക്ബുക്ക് എയർ, മാക്ബുക്ക് പ്രോ ഉൾപ്പെടെയുള്ള വിവിധ ഉൽപ്പന്നങ്ങളുടെ വില ആപ്പിൾ കുത്തനെ വർദ്ധിപ്പിച്ചു. വെള്ളിയാഴ്ച (ജൂൺ 26) മുതൽ പുതിയ നിരക്കുകൾ പ്രാബല്യത്തിൽ വന്നു.
പുതിയ വില വർദ്ധനവ് പ്രകാരം എം5 ചിപ്പോടു കൂടിയ 13 ഇഞ്ച് മാക്ബുക്ക് എയറിന്റെ വില 4,599 ദിർഹത്തിൽ നിന്ന് 5,499 ദിർഹമായും, 15 ഇഞ്ച് മോഡലിന്റേത് 5,499 ദിർഹത്തിൽ നിന്ന് 6,299 ദിർഹമായും ഉയർന്നു. ഏറ്റവും വലിയ വില വർദ്ധനവ് രേഖപ്പെടുത്തിയത് 14 ഇഞ്ച് മാക്ബുക്ക് പ്രോയ്ക്കാണ് (M5 Chip). ഇതിന്റെ പ്രാരംഭ വില 7,199 ദിർഹത്തിൽ നിന്ന് 1,300 ദിർഹം വർദ്ധിച്ച് 8,499 ദിർഹമായി മാറി.
ആർട്ടിഫിഷ്യൽ ഇന്റലിജൻസ് (AI) ഡാറ്റാ സെന്ററുകളുടെ ആഗോള വളർച്ച കാരണം മെമ്മറി, സ്റ്റോറേജ് ചിപ്പുകൾക്ക് വലിയ ദൗർലഭ്യം നേരിടുന്നതാണ് വില വർദ്ധിപ്പിക്കാൻ കാരണമെന്ന് ആപ്പിൾ സി.ഇ.ഒ ടിം കുക്ക് വ്യക്തമാക്കി. ഈ വിലക്കയറ്റം ‘ഒഴിവാക്കാൻ കഴിയാത്തതായിരുന്നു’ എന്ന് അദ്ദേഹം കൂട്ടിച്ചേർത്തു.നിലവിൽ ഐഫോണുകളെ ഈ വിലവർദ്ധനവ് ബാധിച്ചിട്ടില്ലെങ്കിലും, ഈ വർഷം അവസാനം വിപണിയിലെത്താൻ പോകുന്ന ഐഫോൺ 18 പ്രോ (iPhone 18 Pro) ലൈനപ്പിനും മുൻപത്തേക്കാൾ ഉയർന്ന വില നൽകേണ്ടി വരുമെന്നതിന്റെ വ്യക്തമായ സൂചനയാണ് ഇപ്പോൾ മാക്ബുക്കുകളിൽ വരുത്തിയ മാറ്റം.
