തിരക്കേറിയ വേനൽക്കാല യാത്രാ സീസൺ മുതലെടുത്ത് യാത്രക്കാരെ കെണിയിലാക്കാൻ തട്ടിപ്പുകാർ (Fraudsters) സജീവമാണെന്നും കനത്ത ജാഗ്രത പുലർത്തണമെന്നും യു.എ.ഇ ബാങ്ക് ഫെഡറേഷൻ (UBF) ഉപഭോക്താക്കൾക്ക് കർശന നിർദ്ദേശം നൽകി.
തട്ടിപ്പിന്റെ രീതി: വിമാന ടിക്കറ്റുകൾ, ഹോട്ടൽ ബുക്കിംഗുകൾ, ഹോളിഡേ പാക്കേജുകൾ എന്നിവയ്ക്ക് വൻ വിലക്കിഴിവ് വാഗ്ദാനം ചെയ്താണ് തട്ടിപ്പുകാർ ആളുകളെ ആകർഷിക്കുന്നത്. ഇതിനായി വ്യാജ വെബ്സൈറ്റുകൾ, വ്യാജ സോഷ്യൽ മീഡിയ അക്കൗണ്ടുകൾ എന്നിവ നിർമ്മിച്ച്, ഓഫർ നഷ്ടപ്പെടാതിരിക്കാൻ ഉടൻ പണമടയ്ക്കാൻ ആവശ്യപ്പെട്ട് ഇവർ ഉപഭോക്താക്കളെ സമ്മർദ്ദത്തിലാക്കുന്നു.
ഒരു ക്ലിക്ക് വരുത്തുന്ന വിന: “ഒരു അശ്രദ്ധമായ ക്ലിക്ക് നിങ്ങളെ വലിയ സാമ്പത്തിക നഷ്ടത്തിലേക്ക് തള്ളിവിട്ടേക്കാം,” എന്ന് യു.ബി.എഫ് ഓർമ്മിപ്പിച്ചു. ഔദ്യോഗിക ആപ്പ് സ്റ്റോറുകളിൽ നിന്ന് (Google Play Store / Apple App Store) മാത്രം ട്രാവൽ ആപ്പുകൾ ഡൗൺലോഡ് ചെയ്യുക. വ്യാജ ആപ്പുകൾ യഥാർത്ഥ ആപ്പുകളെപ്പോലെ തോന്നിപ്പിച്ച് വ്യക്തിഗത-ബാങ്കിംഗ് വിവരങ്ങൾ ചോർത്താൻ സാധ്യതയുണ്ട്.
സുരക്ഷിതമായി ബുക്ക് ചെയ്യാൻ യു.ബി.എഫ് നൽകുന്ന നിർദ്ദേശങ്ങൾ:
ലൈസൻസുള്ള ട്രാവൽ ഏജൻസികൾ വഴിയോ വിമാനക്കമ്പനികളുടെയും ഹോട്ടലുകളുടെയും ഔദ്യോഗിക വെബ്സൈറ്റുകൾ വഴിയോ നേരിട്ട് ബുക്കിംഗ് നടത്തുക.
വിപണി നിരക്കിനേക്കാൾ അവിശ്വസനീയമാംവിധം കുറഞ്ഞ തുക കാണിക്കുന്ന ഓഫറുകളെ സംശയത്തോടെ വീക്ഷിക്കുക.
വെരിഫൈ ചെയ്യാത്ത ലിങ്കുകളിലൂടെ ഒരുകാരണവശാലും ബാങ്ക് വിവരങ്ങളോ ഒ.റ്റി.പി (OTP – One-Time Password) കോഡുകളോ കൈമാറരുത്.
ഉപഭോക്തൃ സംരക്ഷണം ഉറപ്പുനൽകുന്നതും തട്ടിപ്പ് നടന്നാൽ തുക തിരിച്ചുപിടിക്കാൻ (Disputed transactions) സഹായകരമാകുന്നതുമായ ക്രെഡിറ്റ് കാർഡുകളോ സുരക്ഷിതമായ മറ്റ് ഇലക്ട്രോണിക് പേയ്മെന്റ് രീതികളോ ഉപയോഗിക്കുക.
തട്ടിപ്പിനിരയായാൽ എന്തുചെയ്യണം?: നിങ്ങൾ ഏതെങ്കിലും തരത്തിലുള്ള സാമ്പത്തിക തട്ടിപ്പിന് ഇരയായെന്ന് സംശയം തോന്നിയാൽ ഒട്ടും സമയം കളയാതെ ഉടൻ തന്നെ നിങ്ങളുടെ ബാങ്കുമായി ബന്ധപ്പെട്ട് കാർഡോ അക്കൗണ്ടോ ബ്ലോക്ക് ചെയ്യുകയും, വിവരം പോലീസിലും ബന്ധപ്പെട്ട മറ്റ് ഔദ്യോഗിക അതോറിറ്റികളിലും റിപ്പോർട്ട് ചെയ്യുകയും വേണം.
