ദുബായ്: ഇ-സ്‌കൂട്ടറുകൾക്ക് മെട്രോയിലും ട്രാമിലും ഏർപ്പെടുത്തിയ വിലക്കിന് ഇളവ് നൽകി ആർടിഎ. തീപിടിത്തത്തെ തുടർന്നാണ് ഇ സ്‌കൂട്ടറുകൾക്ക് മെട്രോയിലും ട്രാമിലും വിലക്കേർപ്പെടുത്തിയത്.
സീറ്റ് ഇല്ലാത്ത, മടക്കി സൂക്ഷിക്കാവുന്ന ഇ സ്‌കൂട്ടറുകൾ ഇനി മെട്രോയിലും കൊണ്ടുപോകാൻ കഴിയും. സാധാരണക്കാര്ർർക്ക് ഇത് വലിയ ആശ്വാസമേകുന്ന നടപടിയാണ്. ഇ-സ്‌കൂട്ടറുകൾക്ക് അനുവദിച്ച പരമാവധി ഭാരം 20 കിലോയാണ്. വലുപ്പം 120x70x40 സെന്റിമീറ്റർ. യാത്രകളിൽ കൂടെ കൊണ്ടുപോകാൻ ഇ-സ്‌കൂട്ടറുകൾക്ക് നിബന്ധനകളുണ്ട്. ഇവ എന്തൊക്കെയാണെന്ന് നോക്കാം.
മെട്രോ, ട്രാം സ്റ്റേഷനുകളിലോ പരിസരത്തോ ഇ – സ്‌കൂട്ടറുകൾ ചാർജ് ചെയ്യാൻ പാടില്ല. മെട്രോ, ട്രാം എന്നിവയ്ക്കുള്ളിൽ വാതിലുകൾ, സീറ്റുകൾ, അടിയന്തര ആവശ്യങ്ങൾക്കുള്ള ഉപകരണങ്ങൾ എന്നിവയ്ക്ക് ഒരു തരത്തിലും തടസ്സം ഉണ്ടാക്കരുത്. നനഞ്ഞതോ, ചെളി പുരണ്ടതോ ആയ ഇ- സ്‌കൂട്ടറുകൾ മെട്രോയിൽ കയറ്റില്ല. സ്റ്റേഷന് ഉള്ളിലോ, കാൽനടക്കാർക്കുള്ള പാലങ്ങളിലോ ഇ – സ്‌കൂട്ടർ ഓടിക്കരുത്. മടക്കി കയ്യിൽ പിടിച്ചുകൊണ്ടു തന്നെ പോകണം. സ്റ്റേഷനിൽ പ്രവേശിക്കും മുൻപ് സ്‌കൂട്ടറുകൾ മടക്കി കയ്യിൽ സുരക്ഷിതമായി സൂക്ഷിക്കണമെന്നും ആർടിഎ അധികൃതർ വ്യക്തമാക്കി.
മെട്രോ, ട്രാം എന്നിവയിൽ യാത്ര ചെയ്യുമ്പോൾ ഇ – സ്‌കൂട്ടറിന്റെ പവർ ഓഫ് ചെയ്തു സുരക്ഷിതമാക്കണം. മറ്റു യാത്രക്കാർക്കും മെട്രോ സ്റ്റേഷനിലെ ഉപകരണങ്ങൾക്കും അപകടമോ നാശനഷ്ടമോ ഉണ്ടാക്കാൻ സാധ്യതയുള്ള സ്‌കൂട്ടറിന്റെ ഭാഗങ്ങൾ മൂടി സൂക്ഷിക്കണം. ഹാൻഡിൽ, പെഡൽ തുടങ്ങിയ ഭാഗങ്ങളാണ് പൊതിഞ്ഞു സൂക്ഷിക്കേണ്ടത്. മെട്രോയുടെ ഉള്ളിൽ ഇ – സ്‌കൂട്ടർ സുരക്ഷിതമായി കൈകാര്യം ചെയ്യുന്നതിന്റെ പൂർണ ഉത്തരവാദിത്തം ഉപയോഗിക്കുന്ന ആളിനു മാത്രമാണ്.
കേടായ ബാറ്ററികൾ, ഇരട്ട ബാറ്ററികൾ എന്നിവ സ്‌കൂട്ടറിൽ ഉണ്ടാവരുത്. പരിസ്ഥിതിക്കു ദോഷകരമായ വസ്തുക്കൾ സ്‌കൂട്ടർ പുറന്തള്ളുന്നില്ലെന്ന് ഉറപ്പു വരുത്തണം. ബാറ്ററികൾക്ക് രാജ്യാന്തര നിലവാരം പാലിക്കണമെന്നും അധികൃതർ കൂട്ടിച്ചേർത്തു.
