ദുബായ്: രാജ്യാന്തര ആർട്ടിഫിഷ്യൽ ഇന്റലിജൻസ് കോൺഫറൻസിന് ആതിഥേയത്വം വഹിക്കാൻ ദുബായ്. പൊതു സേവനങ്ങളും വിദ്യാഭ്യാസത്തിന്റെ നിലവാരവും മെച്ചപ്പെടുത്തുന്നതിന് നിർമിത ബുദ്ധി എങ്ങനെ ഉപയോഗിക്കാം എന്നതായിരിക്കും രാജ്യാന്തര എഐ കോൺഫറൻസിലെ പ്രധാന ചർച്ചാവിഷയം. 2025 ഏപ്രിൽ 15 മുതൽ 17 വരെയാണ് സമ്മേളനം നടക്കുന്നത്. യുഎഇയുടെ വിദ്യാഭ്യാസ, ശാസ്ത്രീയ കഴിവുകളും എഐ ഗവേഷണവും വികസനവും ശക്തിപ്പെടുത്തുമെന്ന് ജൈടെക്‌സ് ടെക്‌നോളജി വീക്കിൽ പ്രഖ്യാപിച്ചു.
നിർമിത ബുദ്ധി സാങ്കേതികവിദ്യയിലൂടെ വിദ്യാഭ്യാസത്തിന്റെ നിലവാരം ഉയർത്തുകയാണ് ലക്ഷ്യമിടുന്നതെന്ന് ജിഡിആർഎഫ്എ ഡയറക്ടർ ജനറൽ ലഫ്. ജനറൽ മുഹമ്മദ് അഹമ്മദ് അൽ മർറി അറിയിച്ചു. ആഗോള തലത്തിലെ എഐ വിദഗ്ധർ, ഗവേഷകർ, അക്കാദമിക് വിദഗ്ധർ എന്നിവരെല്ലാം ഈ സമ്മേളനത്തിൽ പങ്കെടുക്കും. പൊതു, വിദ്യാഭ്യാസ സ്ഥാപനങ്ങളിലെ തന്ത്രപരമായ പരിവർത്തനത്തിന് ഈ സമ്മേളനം തുടക്കം കുറിക്കും.
