മെഡിക്കൽ പങ്കാളിത്തത്തിന്റെ മറവിൽ ഒരു അറബ് ഡോക്ടറുടെ ഫണ്ട് തട്ടിയെടുത്ത കേസിൽ 48 കാരനായ യൂറോപ്യൻ പൗരന് ദുബായ് മിസ്‌ഡിമീനേഴ്‌സ് കോടതി ഒരു മാസം തടവും 600,000 ദിർഹം പിഴയും വിധിച്ചു. ശിക്ഷാ കാലാവധി പൂർത്തിയായാൽ ഇയാളെ നാടുകടത്താനും കോടതി ഉത്തരവിട്ടു. പ്രതി 600,000 ദിർഹം വഞ്ചിച്ചുവെന്ന് ആരോപിച്ച് ഡോക്ടർ ഔദ്യോഗിക പരാതി നൽകുകയായിരുന്നു.
ദുബായിൽ 7 മില്യൺ ദിർഹം നിക്ഷേപിച്ച് ഒരു മൾട്ടി-സ്പെഷ്യാലിറ്റി മെഡിക്കൽ സെന്റർ സ്ഥാപിക്കുന്നതിൽ പങ്കാളിയാകാനുള്ള നിർദ്ദേശവുമായി ആ പുരുഷൻ തന്നെ സമീപിച്ചിരുന്നുവെന്ന് ഡോക്ടറുടെ സാക്ഷ്യപത്രത്തിൽ പറയുന്നു. പിന്നീട് താൻ പ്രാരംഭ പേയ്‌മെന്റായി 400,000 ദിർഹം അയാൾക്ക് ട്രാൻസ്ഫർ ചെയ്യുകയും, തുടർന്ന് മറ്റൊരു 200,000 ദിർഹം അയാളുടെ സ്വകാര്യ ബാങ്ക് അക്കൗണ്ടിലേക്ക് ട്രാൻസ്ഫർ ചെയ്യുകയുമായിരുന്നു.
എന്നാൽ ഈ ഫണ്ട് ലഭിച്ചതിനുശേഷം, പ്രതി പദ്ധതിയുടെ പുരോഗതി വൈകിപ്പിക്കാൻ തുടങ്ങി, പങ്കാളിത്തവുമായി മുന്നോട്ട് പോകാനോ പണം തിരികെ നൽകാനോ വിസമ്മതിച്ചു. ഇതോടെ ഡോക്ടർ പരാതി നൽകുകയായിരുന്നു.
