അബുദാബി: ഡ്രൈവർമാർക്ക് ട്രാഫിക് ലൈസൻസിലെ ബ്ലാക്ക് പോയിന്റുകൾ കുറയ്ക്കുന്നതിന് പുതിയ പദ്ധതിയുമായി അബുദാബി പോലീസ്. 24 പോയിന്റിൽ താഴെയാണെങ്കിൽ മോട്ടോർ വാഹന ഉടമകൾക്ക് അവരുടെ റെക്കോർഡിൽ നിന്ന് എട്ട് ബ്ലാക്ക് പോയിന്റുകൾ നീക്കം ചെയ്യാം. 24 പോയിന്റിൽ കൂടുതൽ നേടിയവർക്ക് ഫീസ് അടച്ച ശേഷം വിദ്യാഭ്യാസ കോഴ്‌സുകളിൽ ചേരുന്നതിലൂടെ അവരുടെ ട്രാഫിക് ലൈസൻസ് പുനഃസ്ഥാപിക്കാൻ കഴിയും.
ഈ സേവനം പ്രയോജനപ്പെടുത്താൻ ആഗ്രഹിക്കുന്നവർക്ക് മുഷ്രിഫ് മാൾ സെന്ററിന്റെ ഒന്നാം നിലയിലുള്ള അബുദാബി പോലീസ് പ്ലാറ്റ്‌ഫോമിൽ നടക്കുന്ന വർക്ക്ഷോപ്പുകളിലും കോഴ്സുകളിലും പങ്കെടുക്കാം. 2025 ഒക്ടോബർ 20 മുതൽ നവംബർ 20 വരെ വൈകുന്നേരം 4 മുതൽ രാത്രി 10 വരെയാണ് ഇത് നടക്കുന്നത്. ഗുരുതരമായ ഗതാഗത നിയമലംഘനങ്ങൾ നടത്തുമ്പോൾ വാഹനമോടിക്കുന്നവർക്ക് ബ്ലാക്ക് പോയിന്റുകൾ ചുമത്താറുണ്ട്. കുറ്റകൃത്യത്തിന്റെ തീവ്രതയനുസരിച്ച് പോയിന്റുകളുടെ എണ്ണം നിശ്ചയിക്കും. ഒരു വർഷത്തിനുള്ളിൽ ഒരു വാഹനമോടിക്കുന്നയാൾ 24 പോയിന്റുകൾ നേടിയാൽ, അത് സാധാരണയായി ഡ്രൈവിംഗ് ലൈസൻസ് സസ്‌പെൻഡ് ചെയ്യുന്നതിലേക്ക് നയിക്കുന്നു. അതിനാൽ ബ്ലാക്ക് പോയിന്റുകൾ ഒഴിവാക്കാൻ ഈ അവസരം പ്രയോജനപ്പെടുത്താം.
