ദുബായിലെ ബഡ്ജറ്റ് വിമാനക്കമ്പനിയായ ഫ്ലൈദുബായ് പ്രീമിയം ഇക്കണോമി അവതരിപ്പിക്കാൻ പദ്ധതിയിടുന്നുവെന്ന് ദുബായ് എയർഷോ 2025 ന്റെ മൂന്നാം ദിവസം ഫ്ലൈദുബായുടെ സിഇഒ ഗൈത്ത് അൽ ഗൈത്ത് പറഞ്ഞു.
പ്രീമിയം ഇക്കണോമി, ഇക്കണോമി, ബിസിനസ് ക്ലാസുകൾ എന്നിങ്ങനെ മൂന്ന് ക്ലാസുകൾ ഉണ്ടാകുമെന്ന് അദ്ദേഹം ദുബായ് എയർഷോ വേദിയിൽ പറഞ്ഞു. ഇന്നലെ ചൊവ്വാഴ്ച യൂറോപ്യൻ വിമാന നിർമ്മാതാക്കളായ എയർബസുമായി 24 ബില്യൺ ഡോളർ (88 ബില്യൺ ദിർഹം) വിലമതിക്കുന്ന 150 A321neo വിമാനങ്ങൾക്കായി ഒരു കരാറിൽ ഫ്ലൈദുബായ് ഒപ്പുവച്ചിരുന്നു.
ഈ വിമാനങ്ങൾ 2031 മുതൽ വിതരണം ചെയ്യും. കൂടാതെ, ലോകത്തിലെ ഏറ്റവും വലിയ വിമാനത്താവളമായി മാറാൻ ലക്ഷ്യമിടുന്ന ദുബായ് വേൾഡ് സെൻട്രലിന്റെ വിപുലീകരണ പദ്ധതികളുടെ വിജയത്തിൽ ഈ ഓർഡർ ഒരു പ്രധാന പങ്ക് വഹിക്കുന്നുവെന്നും, അടുത്ത രണ്ട് വർഷത്തിനുള്ളിൽ അൽ മക്തൂം അന്താരാഷ്ട്ര വിമാനത്താവളത്തിൽ നിന്ന് സർവീസുകൾ പുനരാരംഭിക്കാൻ പദ്ധതിയിടുന്നുവെന്നും അദ്ദേഹം പറഞ്ഞു.
ഈ കാരിയർ നിലവിൽ ദുബായ് അന്താരാഷ്ട്ര വിമാനത്താവളത്തിന്റെ ടെർമിനൽ 2 ൽ നിന്നാണ് പ്രവർത്തിക്കുന്നത്.
