യുഎഇ ദേശീയദിനം; ഗാസയിലേക്ക് ഭക്ഷണപ്പൊതികൾ ഒരുക്കി എമിറേറ്റ്‌സ് റെഡ് ക്രെസന്റ്
ദുബായ്: ഗാസയ്ക്ക് സഹായഹസ്തവുമായി യുഎഇ. 54 -ാമത് യുഎഇ ദേശീയ ദിനത്തോടനുബന്ധിച്ച് ഗാസയിലേക്ക് അയക്കാൻ ഭക്ഷണപ്പൊതികൾ അയച്ചിരിക്കുകയാണ് എമിറേറ്റ്‌സ് റെഡ് ക്രെസന്റ്. 1971 പാഴ്‌സലുകളാണ് എമിറേറ്റ്‌സ് റെഡ് ക്രെസന്റ് ഗാസയിലേക്ക് അയച്ചത്. യുഎഇയുടെ മാനുഷിക മൂല്യ ദർശനങ്ങളുടെ ഭാഗമായാണ് നടപടി.
അതേസമയം, ശൈത്യകാലദുരിതം നേരിടുന്ന ജനങ്ങളെ സഹായിക്കാനായി എമിറേറ്റ്‌സ് റെഡ് ക്രെസന്റ് സഹായ കാംപെയ്‌നും ആരംഭിച്ചിട്ടുണ്ട്. അൽ ദഫ്ര മേഖലയിലെ ഭരണാധികാരിയുടെ പ്രതിനിധിയും എമിറേറ്റ്‌സ് റെഡ് ക്രസന്റ് (ഇആർസി) ചെയർമാനുമായ ശൈഖ് ഹംദാൻ ബിൻ സായിദ് അൽ നഹ്യാന്റെ നിർദേശപ്രകാരമാണ് സഹായപദ്ധതി ആരംഭിച്ചത്. ശൈത്യകാല ദുരിതം നേരിടുന്ന 24 രാജ്യങ്ങളിലെ 18,56,324 ആളുകൾക്ക് സഹായമെത്തിക്കും. ഏകദേശം 3,71,26,485 ദിർഹം ഇതിന് വേണ്ടിവരുമെന്നാണ് കണക്കാക്കപ്പെടുന്നത്. ഗാസയിലെ 13,50,000 ദുരിതബാധിതരെ സഹായിക്കാനായി ഇതിനുമുൻപ് ഇആർസി 2.7 കോടിയിലേറെ ദിർഹം ചെലവഴിച്ചിരുന്നു. പലസ്തീൻ ജനതയ്ക്കുള്ള യുഎഇയുടെ മാനുഷികപരിഗണനയുടെ പ്രതിഫലനമാണ് ഈ സഹായം.
ദുരിതബാധിതർക്ക് തുണി, പുതപ്പുകൾ, ചൂടാക്കൽ സാമഗ്രികൾ, ഭക്ഷണം, കുട്ടികളുടെ അവശ്യവസ്തുക്കൾ, ഷെൽട്ടർ സാമഗ്രികൾ എന്നിവ ഇആർസി ശൈത്യകാല സഹായപദ്ധതിയുടെ ഭാഗമായി വിതരണംചെയ്യും. യുഎഇ എംബസികൾ വഴിയും വിദേശത്തുള്ള എമിറേറ്റ്‌സ് റെഡ് ക്രസന്റ് ഓഫീസുകൾ വഴിയുമാണ് സഹായങ്ങളെത്തിക്കുകയെന്ന് ഇആർസിയുടെ ഡയറക്ടർ ബോർഡ് ചെയർമാൻ ഡോ.ഹംദാൻ അൽ മസ്രൂയി പറഞ്ഞു. യുഎഇ പ്രസിഡന്റ് ശൈഖ് മുഹമ്മദ് ബിൻ സായിദ് അൽ നഹ്യാന്റെ നേതൃത്വത്തിലുള്ള യുഎഇയുടെ മാനുഷിക സമീപനങ്ങളാണ് സഹായം നൽകലിൽ പ്രതിഫലിക്കുന്നതെന്നും അദ്ദേഹം കൂട്ടിച്ചേർത്തു.
