ദുബായ്: റമദാനിൽ ദുബായിലെ എല്ലാ പാർക്കുകളിലും സൗജന്യ മെഡിക്കൽ പരിശോധനകൾ ആരംഭിച്ചു. റമദാനിൽ ദുബായിലെ ഏറ്റവും പ്രശസ്തമായ പൊതു ഇടങ്ങളിൽ സൗജന്യ ആരോഗ്യ പരിശോധന ബസുകൾ സഞ്ചരിക്കുമെന്ന് അധികൃതർ വ്യക്തമാക്കി. രോഗബാധ നേരത്തെ കണ്ടെത്തുന്നതിനും പ്രതിരോധ പരിചരണം പ്രോത്സാഹിപ്പിക്കുന്നതിനുമുള്ള ഒരു കൂട്ടായ്മയാണിത്.
ദുബായിലെ ഇസ്ലാമിക് അഫയേഴ്സ് ആൻഡ് ചാരിറ്റബിൾ ആക്ടിവിറ്റീസ് വകുപ്പ്, റമദാൻ കാമ്പയിനായ ‘സ്റ്റെപ്പ് ഓഫ് ലൈഫ്’ എന്നിവയുടെ ഭാഗമായ ഈ പരിപാടിയിൽ പ്രൈം മെഡിക്കൽ കെയറുമായും നൂർ ദുബായ് ഫൗണ്ടേഷനുമായും സഹകരിച്ച് സൗജന്യ മെഡിക്കൽ പരിശോധനകൾ നൽകുമെന്ന് അധികൃതർ അറിയിച്ചു. ഫെബ്രുവരി 26, മാർച്ച് 5, മാർച്ച് 12 തീയതികളിൽ എമിറേറ്റിലുടനീളമുള്ള പ്രധാന ഔട്ട്ഡോർ സ്ഥലങ്ങളിൽ സ്ക്രീനിംഗുകൾ നടക്കും.
ഖുറാനിക് പാർക്ക്, കൈറ്റ് ബീച്ച്, നാദ് അൽ ഷെബ പാർക്ക് എന്നിവിടങ്ങളിൽ വൈകുന്നേരം 4 മണി മുതൽ മഗ്രിബ് പ്രാർത്ഥനാ സമയം വരെ പരിശോധന നടക്കും. വിട്ടുമാറാത്ത രോഗങ്ങൾ നേരത്തേ കണ്ടെത്തുന്നതിനും താമസക്കാർക്കിടയിൽ ആരോഗ്യകരമായ ജീവിതശൈലി പ്രോത്സാഹിപ്പിക്കുന്നതിനും ലക്ഷ്യമിട്ടുള്ള നേത്രപരിശോധന, രക്തസമ്മർദ്ദ പരിശോധന, രക്തത്തിലെ ഗ്ലൂക്കോസ് പരിശോധന എന്നിവ സേവനങ്ങളിൽ ഉൾപ്പെടും.
