തുടർച്ചയായ നാല് മാസത്തെ വിലവർദ്ധനവിന് ശേഷം, 2026 ജൂലൈ മാസത്തിൽ യു.എ.ഇയിലെ പെട്രോൾ വിലയിൽ വലിയ കുറവുണ്ടായേക്കുമെന്ന് റിപ്പോർട്ടുകൾ . ഈ മാസത്തിന്റെ തുടക്കം മുതൽ ആഗോള വിപണിയിൽ അസംസ്കൃത എണ്ണവില (Global oil rates) ബാരലിന് 20 ഡോളറിലധികം കുറഞ്ഞതാണ് ഇതിന് കാരണം.
ഫെബ്രുവരി 28-ന് മിഡിൽ ഈസ്റ്റ് യുദ്ധം പൊട്ടിപ്പുറപ്പെട്ടതു മുതൽ യു.എ.ഇയിലെ റീട്ടെയ്ൽ ഇന്ധനവില വർദ്ധിച്ചുകൊണ്ടിരിക്കുകയായിരുന്നു; ഇത് ഏകദേശം 60 ശതമാനത്തിലധികം ഉയരുകയുണ്ടായി.
കഴിഞ്ഞ ജൂൺ മാസത്തിൽ ഇന്ധനവിലയിൽ മുൻമാസത്തെ അപേക്ഷിച്ച് എട്ട് ശതമാനത്തോളം വർദ്ധനവാണ് രേഖപ്പെടുത്തിയത്. സൂപ്പർ 98 (Super 98) ലിറ്ററിന് 3.95 ദിർഹവും, സ്പെഷ്യൽ 95 (Special 95) ലിറ്ററിന് 3.83 ദിർഹവും, ഇ-പ്ലസ് 91 (E-Plus 91) ലിറ്ററിന് 3.76 ദിർഹവുമായിരുന്നു ജൂണിലെ നിരക്കുകൾ.
എന്നാൽ ജൂൺ മാസത്തിലുടനീളം ആഗോള എണ്ണവില താഴേക്ക് പോയതോടെ, അടുത്ത മാസം (ജൂലൈ) രാജ്യത്തെ ഇന്ധനവില കുറയുമെന്ന ശക്തമായ പ്രതീക്ഷയിലാണ് ജനങ്ങൾ.
ജൂൺ ആദ്യവാരത്തിൽ ബാരലിന് 95 ഡോളറിനടുത്തായിരുന്ന ബ്രെന്റ് ക്രൂഡ് ഓയിൽ (Brent) വില ബുധനാഴ്ചയായപ്പോഴേക്കും 74 ഡോളറിലേക്ക് താണിരുന്നു. യു.എസ്-ഇറാൻ സമാധാന കരാറും, ഹോർമൂസ് കടലിടുക്ക് വീണ്ടും തുറക്കുന്നതോടെ ഗൾഫ് രാജ്യങ്ങളിൽ നിന്നുള്ള എണ്ണ വിതരണം ആഗോള ഊർജ്ജ വിപണിയിലേക്ക് തിരികെ എത്തുമെന്ന പ്രതീക്ഷയുമാണ് അന്താരാഷ്ട്ര വിപണിയിൽ വില ഇടിയാൻ കാരണമായത്.
