എത്തിഹാദ് റെയിൽ യാത്രക്കാർക്ക് സ്റ്റേഷനുകളിൽ നിന്ന് മറ്റ് സ്ഥലങ്ങളിലേക്ക് പോകുന്നതിനായി മികച്ച കണക്റ്റിവിറ്റി സൗകര്യങ്ങൾ ഒരുക്കുന്നു. അബുദാബി മുഹമ്മദ് ബിൻ സായിദ് സിറ്റി സ്റ്റേഷനിൽ നിന്ന് അഡ്നോക് (Adnoc) ആസ്ഥാനം, അഡ്നെക് (Adnec) സെന്റർ, റീം മോൾ എന്നിവിടങ്ങളിലേക്ക് വെറും 10 ദിർഹത്തിന് ഷട്ടിൽ ബസ് സർവീസ് ലഭ്യമാക്കും.
എത്തിഹാദ് റെയിൽ ആപ്പ് വഴിയോ വെബ്സൈറ്റ് വഴിയോ ഈ ബസ് ടിക്കറ്റുകൾ ബുക്ക് ചെയ്യാം. റൂട്ടിന്റെ മറുഭാഗമായ ഫുജൈറ സ്റ്റേഷനിൽ ആദ്യ ദിവസം മുതൽ തന്നെ കാർ റെന്റൽ ഡെസ്കുകൾ, ടാക്സി സൗകര്യങ്ങൾ, ഇ-ഹെയ്ലിംഗ് (ഉബർ/കരീം പോലുള്ളവ) പിക്ക്-അപ്പ് പോയിന്റുകൾ എന്നിവയും സജ്ജീകരിക്കും.
ട്രെയിൻ സമയത്തിനനുസരിച്ച് ബസ്, ടാക്സി സർവീസുകൾ ക്രമീകരിക്കാൻ പൊതുഗതാഗത അതോറിറ്റികളുമായി നേരിട്ട് ഏകോപനം നടത്തുന്നുണ്ടെന്ന് എത്തിഹാദ് റെയിൽ മൊബിലിറ്റി കൊമേഴ്സ്യൽ എക്സിക്യൂട്ടീവ് ഡയറക്ടർ അദ്റ അൽമൻസൂരി അറിയിച്ചു. കൂടാതെ ഹോട്ടൽ താമസം ഉൾപ്പെടെയുള്ള പ്രത്യേക ടൂറിസം പാക്കേജുകൾക്കായുള്ള ചർച്ചകളും പുരോഗമിക്കുകയാണ്.
