ലഹരി ഉപയോഗത്തിൽ നിന്നും മയക്കുമരുന്ന് മാഫിയയുടെ കെണികളിൽ നിന്നും യുവാക്കളെയും കുട്ടികളെയും സംരക്ഷിക്കുന്നതിനായി രാജ്യവ്യാപകമായി പ്രതിരോധ പ്രവർത്തനങ്ങൾ ശക്തമാക്കി യു.എ.ഇ ആഭ്യന്തര മന്ത്രാലയവും വിവിധ എമിറേറ്റുകളിലെ പോലീസും.
മയക്കുമരുന്ന് കച്ചവടക്കാർ തങ്ങളുടെ നെറ്റ്വർക്കുകൾ വ്യാപിപ്പിക്കാൻ സോഷ്യൽ മീഡിയ, മെസ്സേജിംഗ് ആപ്പുകൾ, ഓൺലൈൻ ഗെയിമിംഗ് പ്ലാറ്റ്ഫോമുകൾ എന്നിവയാണ് ഇപ്പോൾ പ്രധാനമായും ഉപയോഗിക്കുന്നത്. ഡിജിറ്റൽ മാധ്യമങ്ങളിലൂടെ കുട്ടികളെ ലക്ഷ്യമിടുന്ന ഈ സംഘങ്ങൾക്കെതിരെ മാതാപിതാക്കൾ അതീവ ജാഗ്രത പുലർത്തണമെന്ന് അധികൃതർ മുന്നറിയിപ്പ് നൽകുന്നു.
ലഹരിക്കടത്ത് തടയുന്നതിനൊപ്പം സ്കൂളുകൾ, സർവ്വകലാശാലകൾ, ഷോപ്പിംഗ് മാളുകൾ, കമ്മ്യൂണിറ്റി പരിപാടികൾ എന്നിവ കേന്ദ്രീകരിച്ച് വിപുലമായ ബോധവത്കരണ കാമ്പെയ്നുകളാണ് പോലീസ് നടത്തുന്നത്. ലഹരിയുടെ ആരോഗ്യപരവും നിയമപരവുമായ പ്രത്യാഘാതങ്ങളെക്കുറിച്ച് യുവതലമുറയെ ബോധവാന്മാരാക്കുകയാണ് ഇതിലൂടെ ലക്ഷ്യമിടുന്നത്.
മയക്കുമരുന്നിനെതിരെയുള്ള ഏറ്റവും പ്രധാനപ്പെട്ട ആദ്യ പ്രതിരോധ നിര എന്നത് ‘മുൻകരുതൽ’ ആണെന്ന് അബുദാബി പോലീസ് ആന്റി നാർക്കോട്ടിക് ഡയറക്ടറേറ്റ് ഡയറക്ടർ ബ്രിഗേഡിയർ താഹർ ഗരീബ് അൽ ദാഹേരി വ്യക്തമാക്കി.
ലഹരി ഉപയോഗത്തിന്റെ ആദ്യകാല ലക്ഷണങ്ങൾ എങ്ങനെ തിരിച്ചറിയാമെന്നും, ലഹരിക്ക് അടിമപ്പെട്ടവർക്ക് എങ്ങനെ സ്വമേധയാ ചികിത്സ ലഭ്യമാക്കാമെന്നും, മയക്കുമരുന്ന് കച്ചവടക്കാരെക്കുറിച്ച് എങ്ങനെ പോലീസിൽ അറിയിക്കാമെന്നും കുടുംബങ്ങളെ പഠിപ്പിക്കാൻ ഈ കാമ്പെയ്നുകളിലൂടെ സാധിക്കുന്നുണ്ടെന്നും അദ്ദേഹം കൂട്ടിച്ചേർത്തു.
ലഹരിക്കടത്ത് ശൃംഖലകളെ തകർക്കാൻ ഇന്റലിജൻസ് വിവരങ്ങളുടെ അടിസ്ഥാനത്തിൽ അബുദാബി പോലീസ് നടത്തിയ അത്യാധുനിക അന്വേഷണത്തിൽ വൻ മയക്കുമരുന്ന് ശേഖരം കണ്ടെത്തി. മാർബിൾ സിലിണ്ടറുകൾക്കുള്ളിൽ അതീവ രഹസ്യമായി ഒളിപ്പിച്ചു കടത്താൻ ശ്രമിച്ച 184 കിലോഗ്രാം മയക്കുമരുന്നാണ് പോലീസ് പിടിച്ചെടുത്തത്. സംഭവവുമായി ബന്ധപ്പെട്ട് രണ്ട് പ്രതികളെ അറസ്റ്റ് ചെയ്തു. വിപണിയിൽ എത്തുന്നതിന് മുൻപ് തന്നെ ലഹരിമരുന്ന് ശേഖരം കണ്ടെത്താൻ കഴിഞ്ഞത് പോലീസിന്റെ അത്യാധുനിക അന്വേഷണ മികവു മൂലമാണെന്ന് അധികൃതർ വ്യക്തമാക്കി.
മയക്കുമരുന്ന് ഉപയോഗവും ലഹരിയിലുള്ള വണ്ടിയോടിക്കലും തടയുന്നതിനായി അബുദാബി പോലീസ് നടപ്പിലാക്കുന്ന ‘ഡ്രൈവ് സേഫ്ലി’ (Drive Safely) പദ്ധതി വലിയ വിജയമായി മുന്നേറുകയാണ്. കഴിഞ്ഞ നാല് വർഷത്തിനിടെ 15 ലക്ഷത്തിലധികം (1.5 Million) ആളുകളിലേക്ക് ഈ പദ്ധതിയുടെ സന്ദേശം എത്തിക്കാൻ സാധിച്ചിട്ടുണ്ട്.തുടക്കക്കാരായ ഡ്രൈവർമാർക്ക് ലഹരി ഉപയോഗത്തിന്റെ അപകടങ്ങളെക്കുറിച്ചും അത് റോഡ് സുരക്ഷയെ എങ്ങനെ ബാധിക്കുന്നുവെന്നതിനെക്കുറിച്ചും ഈ പദ്ധതിയിലൂടെ പ്രത്യേക പരിശീലനവും ബോധവത്കരണവും നൽകുന്നു.
കൂടാതെ, പൊതുപരിപാടികൾ, സർവ്വകലാശാലകൾ, ജനങ്ങൾ ഒത്തുകൂടുന്ന സ്ഥലങ്ങൾ എന്നിവ കേന്ദ്രീകരിച്ച് പോലീസിന്റെ ‘സ്മാർട്ട് ഡിജിറ്റൽ ബസ്’ (Smart Digital Bus for Drug Prevention) വിപുലമായ രീതിയിൽ പര്യടനം നടത്തുന്നുണ്ട്. ലഹരി വിരുദ്ധ പ്രതിരോധം, കൗൺസിലിംഗ്, ചികിത്സ, ലഹരി വിൽപ്പനക്കാരെക്കുറിച്ച് പോലീസിൽ വിവരമറിയിക്കാനുള്ള നടപടികൾ എന്നിവയെല്ലാം ഡിജിറ്റൽ സാങ്കേതികവിദ്യയുടെ സഹായത്തോടെ ഈ ബസിനുള്ളിൽ ജനങ്ങൾക്ക് വിശദീകരിച്ചു നൽകുന്നു.
