വാണിജ്യ തട്ടിപ്പുകൾ തടയുന്നതിനായി യു.എ.ഇ ‘2023-ലെ ഫെഡറൽ ഡിക്രി-ലോ നമ്പർ 42’ (Federal Decree-Law No. 42 of 2023) ശക്തമാക്കിയിട്ടുണ്ട്. വ്യാജവും സുരക്ഷിതമല്ലാത്തതുമായ സാധനങ്ങൾ നിർമ്മിക്കുന്നവർക്കും വിൽക്കുന്നവർക്കും വിതരണം ചെയ്യുന്നവർക്കും എതിരെ ഈ നിയമപ്രകാരം കർശനമായ ശിക്ഷാനടപടികളുണ്ടാകും.
ഈ നിയമത്തിലെ ആർട്ടിക്കിൾ 4 പ്രകാരം വ്യാജമായതോ, കൃത്രിമം കാണിച്ചതോ (Adulterated), കേടായതോ (Spoiled) ആയ സാധനങ്ങൾ ഇറക്കുമതി ചെയ്യുക, നിർമ്മിക്കുക, വിൽക്കുക, സംഭരിക്കുക, കടത്തുക, പരസ്യം ചെയ്യുക അല്ലെങ്കിൽ കൈവശം വെക്കുക എന്നിവ പൂർണ്ണമായി നിരോധിച്ചിരിക്കുന്നു. ഇത്തരം പ്രവർത്തനങ്ങൾക്ക് മുതിരുന്നതും (Attempting) നിയമലംഘനമായി കണക്കാക്കും.
- തട്ടിപ്പ് നടത്തുക എന്ന ഉദ്ദേശ്യത്തോടെ വ്യാജ ഉൽപ്പന്നങ്ങളോ അവ നിർമ്മിക്കാനുള്ള അസംസ്കൃത വസ്തുക്കളോ ഇറക്കുമതി ചെയ്യുക.വ്യാജമാണെന്ന് അറിഞ്ഞുകൊണ്ട് തന്നെ ഉൽപ്പന്നങ്ങൾ വിൽക്കുകയോ കൈമാറ്റം ചെയ്യുകയോ ചെയ്യുക.
- ഒരു ഉൽപ്പന്നത്തിന്റെ തരം, അളവ്, രാജ്യം (Origin), കാലാവധി എന്നിവയെക്കുറിച്ച് ഉപഭോക്താക്കളെ തെറ്റിദ്ധരിപ്പിക്കുക.
- തെറ്റായ വിവരങ്ങൾ നൽകി ഉൽപ്പന്നങ്ങൾ പരസ്യം ചെയ്യുകയോ വിൽക്കുകയോ ചെയ്യുക.
- രൂപമാറ്റം വരുത്താനോ മാറ്റിവെക്കാനോ ഉള്ള ഉദ്ദേശ്യത്തോടെ വ്യാജ ഉൽപ്പന്നങ്ങൾ സൂക്ഷിക്കുക.
ഉപഭോക്താക്കൾക്കുള്ള നിർദ്ദേശങ്ങൾ:
- അംഗീകൃത സ്റ്റോറുകളിൽ നിന്നും ഔദ്യോഗികമായി വെരിഫൈ ചെയ്ത ഓൺലൈൻ പ്ലാറ്റ്ഫോമുകളിൽ നിന്നും മാത്രം സാധനങ്ങൾ വാങ്ങുക.
- സോഷ്യൽ മീഡിയ വഴിയും അല്ലാതെയും ലൈസൻസില്ലാതെ പ്രവർത്തിക്കുന്ന ഓൺലൈൻ വിപണനക്കാരെ വിശ്വസിക്കരുത്.
- ഉൽപ്പന്നങ്ങൾ വാങ്ങുമ്പോൾ അവയുടെ നിർമ്മാണ രാജ്യം, കാലാവധി (Expiry date) എന്നിവ കൃത്യമായി പരിശോധിക്കുക.
- ഓരോ വാങ്ങലിന് ശേഷവും അതിന്റെ ഇൻവോയ്സും (Invoice) വാറന്റി കാർഡും കൃത്യമായി സൂക്ഷിക്കുക.
- സംശയാസ്പദമായ ഉൽപ്പന്നങ്ങളോ തെറ്റിദ്ധരിപ്പിക്കുന്ന പരസ്യങ്ങളോ കണ്ടാൽ ഉടൻ തന്നെ അധികൃതരെ വിവരമറിയിക്കുക.
- ഭക്ഷ്യവസ്തുക്കൾ, മരുന്നുകൾ, സൗന്ദര്യവർദ്ധക വസ്തുക്കൾ (Cosmetics) എന്നിവയിലെ കൃത്രിമത്വം പൊതുജനാരോഗ്യത്തെയും സുരക്ഷയെയും സാരമായി ബാധിക്കുമെന്നതിനാലാണ് അധികൃതർ പരിശോധനകളും നിയമങ്ങളും കർശനമാക്കിയിരിക്കുന്നത്.
ഉപഭോക്താക്കളുടെ അവകാശങ്ങൾ സംരക്ഷിക്കുന്നതിനും വിപണിയിലെ വിശ്വാസ്യത നിലനിർത്തുന്നതിനുമായി യു.എ.ഇ വാണിജ്യ തട്ടിപ്പുകൾക്കെതിരെയുള്ള ശിക്ഷാ നടപടികൾ കർശനമാക്കിയിട്ടുണ്ട്.
കടുത്ത ശിക്ഷകളും പിഴയും: പുതിയ നിയമത്തിലെ ആർട്ടിക്കിൾ 17 പ്രകാരം വാണിജ്യ തട്ടിപ്പ് നടത്തുന്ന നിയമലംഘകർക്ക് രണ്ട് വർഷം വരെ തടവോ, 5,000 ദിർഹം മുതൽ 10 ലക്ഷം (1 മില്യൺ) ദിർഹം വരെ പിഴയോ, അല്ലെങ്കിൽ ഇവ രണ്ടും കൂടിയോ ശിക്ഷയായി ലഭിക്കാം.
കുറ്റകരമായ കാര്യങ്ങൾ: വ്യാജമായതോ (Counterfeit), കൃത്രിമം കാണിച്ചതോ (Adulterated), കേടായതോ (Spoiled) ആയ സാധനങ്ങൾ ഇറക്കുമതി ചെയ്യുക, നിർമ്മിക്കുക, സംഭരിക്കുക, കടത്തുക, പരസ്യം ചെയ്യുക, വിൽക്കുക അല്ലെങ്കിൽ വിപണനം നടത്തുക എന്നിവയെല്ലാം ഈ കനത്ത ശിക്ഷയുടെ പരിധിയിൽ വരും.
പൊതുജന പങ്കാളിത്തം: വിപണിയിൽ സംശയാസ്പദമായ ഉൽപ്പന്നങ്ങളോ ഉപഭോക്താക്കളെ തെറ്റിദ്ധരിപ്പിക്കുന്ന തരത്തിലുള്ള പരസ്യങ്ങളോ ശ്രദ്ധയിൽപ്പെട്ടാൽ ഉടൻ തന്നെ ബന്ധപ്പെട്ട അധികൃതരെ വിവരമറിയിക്കാൻ യു.എ.ഇ നിവാസികളോട് ആവശ്യപ്പെട്ടിട്ടുണ്ട്.
