യു.എ.ഇയുടെ ഉൾപ്രദേശങ്ങളിൽ ചൂട് കടുക്കുമെന്നും താപനില 47 മുതൽ 48 ഡിഗ്രി സെൽഷ്യസ് വരെ ഉയർന്നേക്കുമെന്നും എൻ.സി.എം (NCM) മുന്നറിയിപ്പ് നൽകി. തീരദേശങ്ങളിലും ദ്വീപുകളിലും 43 മുതൽ 47 ഡിഗ്രി വരെയും മലയോര മേഖലകളിൽ 32 മുതൽ 37 ഡിഗ്രി വരെയുമായിരിക്കും താപനില.
രാജ്യത്തിന്റെ കിഴക്ക് ഭാഗത്ത് നിന്നുള്ള ഉപരിതല ന്യൂനമർദ്ദവും അന്തരീക്ഷത്തിന്റെ മുകൾത്തട്ടിലുള്ള ന്യൂനമർദ്ദവും ചേരുന്നതോടെ കാർമേഘങ്ങൾ (Convective clouds) രൂപപ്പെടാൻ അനുകൂലമായ സാഹചര്യമുണ്ടാകും. ഇത് കിഴക്കൻ, തെക്കൻ പ്രദേശങ്ങളിൽ മഴയ്ക്ക് കാരണമായേക്കാം.
മണിക്കൂറിൽ 10 മുതൽ 25 കിലോമീറ്റർ വേഗതയിലും ചിലയിടങ്ങളിൽ പരമാവധി 40 കിലോമീറ്റർ വരെ വേഗതയിലും തെക്ക്-കിഴക്കൻ, വടക്ക്-കിഴക്കൻ കാറ്റ് വീശാൻ സാധ്യതയുണ്ട്. ഇത് തുറസ്സായ സ്ഥലങ്ങളിൽ പൊടിപടലങ്ങൾ ഉയരുന്നതിന് ഇടയാക്കും. കടൽ സാധാരണ നിലയിലായിരിക്കും.
ഈ അസ്ഥിരമായ കാലാവസ്ഥാ സാഹചര്യം വെള്ളിയാഴ്ചയും തുടരും. ഭാഗികമായി മേഘാവൃതമായ ആകാശമായിരിക്കുമെങ്കിലും കിഴക്കൻ, തെക്കൻ മേഖലകളിൽ വീണ്ടും മഴയ്ക്ക് സാധ്യതയുണ്ട്.
