ചെങ്കടലിൽ സൗദി എണ്ണക്കപ്പലിന് നേരെ ആക്രമണം; ജീവനക്കാർ സുരക്ഷിതർ !
യമനിലെ ഹുതി വിമതരാണ് ആക്രമണത്തിന്റെ ഉത്തരവാദിത്തം ഏറ്റെടുത്തിരിക്കുന്നത്
ചെങ്കടലിലൂടെ സഞ്ചരിക്കുകയായിരുന്ന ‘എൻസെലിയ’ (ENCELIA) എന്ന സൗദി കമ്പനിയുടെ ഉടമസ്ഥതയിലുള്ള എണ്ണക്കപ്പലിന് നേരെ ആക്രമണമുണ്ടായതായി സൗദി പ്രസ് ഏജൻസി (SPA) അറിയിച്ചു. തീപിടിത്തം: ആക്രമണത്തെ തുടർന്ന് കപ്പലിന്റെ മുൻഭാഗത്ത് (Bow) തീപിടിത്തമുണ്ടായി. എന്നാൽ കപ്പലിലെ മുഴുവൻ ജീവനക്കാരും പൂർണ്ണമായും സുരക്ഷിതരാണെന്ന് അധികൃതർ വ്യക്തമാക്കി.
യമനിലെ ഹുതി വിമതരാണ് ആക്രമണത്തിന്റെ ഉത്തരവാദിത്തം ഏറ്റെടുത്തത്. തങ്ങൾ ഏർപ്പെടുത്തിയ ഉപരോധ മാനദണ്ഡങ്ങൾ ലംഘിച്ചതിനാണ് മിസൈലുകളും ഡ്രോണുകളും ഉപയോഗിച്ച് ആക്രമണം നടത്തിയതെന്ന് ഹുതി വക്താവ് അവകാശപ്പെട്ടു.
കപ്പലിന്റെയും ജീവനക്കാരുടെയും സുരക്ഷ ഉറപ്പാക്കാനും, സമുദ്ര പരിസ്ഥിതിക്ക് നാശനഷ്ടങ്ങൾ ഉണ്ടാകാതിരിക്കാനുമുള്ള മുൻകരുതൽ നടപടികൾ സൗദി അതോറിറ്റി സ്വീകരിച്ചിട്ടുണ്ട്. അന്താരാഷ്ട്ര നിയമങ്ങളുടെ ലംഘനമാണ് ഈ ആക്രമണമെന്ന് സൗദി ഗതാഗത അതോറിറ്റി വ്യക്തമാക്കി.
