ഒമാനിലെ അൽ ഹല്ലാനിയത്ത് ദ്വീപുകൾക്ക് സമീപം കരയ്ക്കടിഞ്ഞ കപ്പലിൽ നിന്നുണ്ടായ എണ്ണച്ചോർച്ച ഏകദേശം 390 ചതുരശ്ര കിലോമീറ്റർ വിസ്തൃതിയിൽ പടർന്നതായി അധികൃതർ അറിയിച്ചു. ചോർച്ച തടയുന്നതിനും കപ്പൽ സുരക്ഷിതമാക്കുന്നതിനുമുള്ള തീവ്രശ്രമത്തിലാണ് ദുരന്തനിവാരണ സേനകൾ.
കരയ്ക്കടിഞ്ഞ ‘കരോലിൻ ബെസെഞ്ചി’ (Caroline Bezengi) എന്ന കപ്പലിന് സമീപത്തെ സമുദ്രോപരിതലത്തിൽ എണ്ണ മലിനീകരണം നിലനിൽക്കുന്നതായി സാറ്റലൈറ്റ് ചിത്രങ്ങളും സാങ്കേതിക പരിശോധനകളും വ്യക്തമാക്കുന്നതായി ഒമാൻ പരിസ്ഥിതി അതോറിറ്റി അറിയിച്ചു. ദ്വീപുകളിൽ നിന്ന് പ്രധാന കരയുടെ തീരത്തേക്ക് വടക്കുകിഴക്ക് ദിശയിലാണ് എണ്ണപ്പാടം പടർന്നിരിക്കുന്നത്. ഏറ്റവും അടുത്തുള്ള പ്രദേശത്ത് തീരത്തുനിന്ന് ഏകദേശം 7 കിലോമീറ്റർ അകലെയാണ് മലിനീകരണമുള്ളത്.
ഏകദേശം 449 കിലോമീറ്റർ നീളമുള്ള പാതയിലുടനീളം എണ്ണപ്പാടം നിരീക്ഷിക്കപ്പെട്ടിട്ടുണ്ടെന്നും പൊതുവെ വടക്കുകിഴക്ക് ദിശയിലേക്കാണ് ഇത് നീങ്ങിക്കൊണ്ടിരിക്കുന്നതെന്നും അധികൃതർ വ്യക്തമാക്കി. കാറ്റ്, സമുദ്രജല പ്രവാഹം, കടലിന്റെ അവസ്ഥ എന്നിവയെ ആശ്രയിച്ച് അടുത്ത 48 മണിക്കൂറിനുള്ളിൽ ഇത് ഏകദേശം 121 കിലോമീറ്റർ കൂടി മുന്നേറാൻ സാധ്യതയുണ്ടെന്ന് നിലവിലെ ഡാറ്റാ മോഡലിംഗ് സൂചിപ്പിക്കുന്നു.
ഈ പ്രവചനം നേരിട്ടുള്ള നിരീക്ഷണത്തേക്കാൾ ശാസ്ത്രീയമായ മോഡലിംഗിനെ അടിസ്ഥാനമാക്കിയുള്ളതാണെന്നും ഇതിൽ മാറ്റങ്ങൾ വരാമെന്നും ഉദ്യോഗസ്ഥർ വ്യക്തമാക്കി. 390 ചതുരശ്ര കിലോമീറ്റർ എന്നത് ചോർന്ന എണ്ണയുടെ വ്യാപ്തിയല്ല, മറിച്ച് മലിനീകരണം കണ്ടെത്തിയ ഭൂമിശാസ്ത്രപരമായ വിസ്തൃതിയാണ്.
കൂടുതൽ കട്ടിയുള്ള എണ്ണപ്പാടങ്ങൾ റാസ് മദ്രകയുടെ സമീപത്തേക്ക് നീങ്ങാൻ സാധ്യതയുണ്ടെന്ന വിലയിരുത്തലിനെത്തുടർന്ന്, പരിസ്ഥിതി ലോലമായ സമുദ്രതീര മേഖലകളിൽ നിരീക്ഷണം ശക്തമാക്കിയിട്ടുണ്ട്.
തീരപ്രദേശങ്ങളിലെ ഡീസലൈനേഷൻ പ്ലാന്റുകൾ, മത്സ്യബന്ധന പദ്ധതികൾ, സാമ്പത്തിക-വിനോദസഞ്ചാര കേന്ദ്രങ്ങൾ എന്നിവയുൾപ്പെടെയുള്ള സുപ്രധാന സംവിധാനങ്ങൾക്ക് യാതൊരു ഭീഷണിയുമില്ലെന്ന് പരിശോധനകളിൽ വ്യക്തമായതായി പരിസ്ഥിതി അതോറിറ്റി ചെയർമാൻ അബ്ദുല്ല ബിൻ അലി അൽ അംരി പറഞ്ഞു. സമുദ്രജലം തുടർച്ചയായി പരിശോധിച്ചുവരികയാണെന്നും അദ്ദേഹം കൂട്ടിച്ചേർത്തു.
കപ്പലിന്റെ അടിത്തട്ടിലുണ്ടായ കേടുപാടുകൾ വിലയിരുത്താനും ചോർച്ചയുടെ ഉറവിടങ്ങൾ കണ്ടെത്താനും, കപ്പലിലെ എണ്ണ സുരക്ഷിതമായി മാറ്റിയ ശേഷം പിന്നീട് കപ്പൽ പൂർണ്ണമായി നീക്കം ചെയ്യാനുമുള്ള തയ്യാറെടുപ്പിലാണ് വിദഗ്ധ സംഘമെന്ന് ഗതാഗത, വാർത്താവിനിമയ, വിവരസാങ്കേതിക മന്ത്രാലയം അറിയിച്ചു.
ഖരീഫ് സീസണിലെ പ്രതികൂല കാലാവസ്ഥ ഡൈവിംഗ് ഉൾപ്പെടെയുള്ള പ്രവർത്തനങ്ങളെയും കപ്പലിന് ചുറ്റുമുള്ള ജോലികളെയും ബുദ്ധിമുട്ടിലാക്കിയിട്ടുണ്ട്. അതേസമയം, ഈ കാലാവസ്ഥാ സാഹചര്യങ്ങൾ എണ്ണയെ ഒമാൻ തീരത്തുനിന്ന് അകറ്റി നിർത്താൻ സഹായിച്ചിട്ടുണ്ടെന്നും ഉദ്യോഗസ്ഥർ പറഞ്ഞു.
മലിനീകരണം നിരീക്ഷിക്കുന്നതിനായി വിമാനങ്ങൾ, സാറ്റലൈറ്റ് ചിത്രങ്ങൾ, സമുദ്ര സർവേകൾ, പരിസ്ഥിതി നിരീക്ഷണ മോഡലിംഗ് എന്നിവ മുഴുവൻ സമയവും ഉപയോഗിക്കുന്നുണ്ട്.
