യു.എ.ഇയുടെ വിവിധയിടങ്ങളിൽ കനത്ത മൂടൽമഞ്ഞ്: റെഡ് അലേർട്ട് പ്രഖ്യാപിച്ചു; ഡ്രൈവർമാർക്ക് ജാഗ്രതാ നിർദ്ദേശം

യുഎഇയിൽ ഇന്ന് സെപ്റ്റംബർ 28 തിങ്കളാഴ്ച കനത്ത മൂടൽമഞ്ഞിനും കാഴ്ചപരിധി കുറയുന്നതിനും സാധ്യതയുണ്ടെന്ന് ദേശീയ കാലാവസ്ഥാ കേന്ദ്രം (NCM) മുന്നറിയിപ്പ് നൽകി. കാലാവസ്ഥാ വകുപ്പ് റെഡ് അലേർട്ട് പുറപ്പെടുവിച്ചിട്ടുണ്ട്.

കഴിഞ്ഞ കുറച്ചു ദിവസങ്ങളായി രാജ്യത്തിന്റെ വിവിധ ഭാഗങ്ങളിൽ ശക്തമായ മൂടൽമഞ്ഞ് അനുഭവപ്പെടുന്ന സാഹചര്യത്തിൽ, വാഹനമോടിക്കുന്നവർ വേഗത കുറയ്ക്കണമെന്നും ജാഗ്രത പാലിക്കണമെന്നും റാസൽഖൈമ പൊലീസും സുരക്ഷാ ഏജൻസികളും അഭ്യർത്ഥിച്ചു.

പുലർച്ചെ 3:34 മുതൽ രാവിലെ 9:30 വരെ ശക്തമായ മൂടൽമഞ്ഞിനും കാഴ്ചപരിധി (Horizontal visibility) ഗണ്യമായി കുറയുന്നതിനും സാധ്യതയുള്ളതിനാലാണ് NCM റെഡ് അലേർട്ട് പുറപ്പെടുവിച്ചത്.

പ്രധാന നഗരങ്ങളിലെ താപനില:

അബുദാബി: ഉയർന്ന താപനില 43°C, കുറഞ്ഞ താപനില 28°C

ദുബായ്: ഉയർന്ന താപനില 40°C, കുറഞ്ഞ താപനില 30°C

ഷാർജ: ഉയർന്ന താപനില 37°C, കുറഞ്ഞ താപനില 27°C

മറ്റ് കാലാവസ്ഥാ മാറ്റങ്ങൾ:

ഭാഗികമായി മേഘാവൃതമായ അന്തരീക്ഷമായിരിക്കും. ഉച്ചയ്ക്ക് ശേഷം കിഴക്കൻ മേഖലകളിൽ മേഘ രൂപീകരണത്തിന് സാധ്യതയുണ്ട്.

രാത്രിയിലും ചൊവ്വാഴ്ച പുലർച്ചെയും ഈർപ്പമുള്ള അന്തരീക്ഷവും (Humidity) തീരദേശ/ഉൾനാടൻ പ്രദേശങ്ങളിൽ മഞ്ഞിനും സാധ്യതയുണ്ട്.

കാറ്റിന്റെ വേഗത മണിക്കൂറിൽ 10 മുതൽ 20 കി.മീ വരെയും ചില സമയങ്ങളിൽ 35 കി.മീ വരെയും ഉയരാം. അറേബ്യൻ ഉൾക്കടലിലും ഒമാൻ കടലിലും കടൽ ശാന്തമായിരിക്കും.