ഇറാൻ മുതിർന്ന ഉദ്യോഗസ്ഥനും ഭരണനേതൃത്വത്തിന്റെ മുതിർന്ന ഉപദേഷ്ടാവുമായ അലി അക്ബർ വെലായത്തി (Ali Akbar Velayati) നടത്തിയ വിമർശനങ്ങൾ തള്ളി യു.എ.ഇ രാഷ്ട്രപതിയുടെ നയതന്ത്ര ഉപദേഷ്ടാവ് ഡോ. അൻവർ ഗർഗാഷ്. ഗ്രേറ്റർ ടുൺബ്, ലെസ്സർ ടുൺബ്, അബു മൂസ എന്നീ മൂന്ന് ദ്വീപുകളുടെ തർക്കം സമാധാനപരമായ മാർഗ്ഗങ്ങളിലൂടെ പരിഹരിക്കാനാണ് അബുദാബി ആഗ്രഹിക്കുന്നതെന്ന് അദ്ദേഹം ആവർത്തിച്ചു.
ഐക്യരാഷ്ട്രസഭയുടെ പൊതുസഭയിൽ (UNGA) യു.എ.ഇ ഉന്നയിച്ച അവകാശവാദങ്ങളെ വിമർശിച്ച അലി അക്ബർ വെലായത്തിക്ക് ഡോ. അൻവർ ഗർഗാഷ് ‘X’-ലൂടെ ശക്തമായ മറുപടി നൽകി. അലി അക്ബർ വെലായത്തിയുടെ പ്രസ്താവന ചരിത്രവസ്തുതകൾക്കും രേഖകൾക്കും വിരുദ്ധമായ വെറും രാഷ്ട്രീയ നിലപാട് മാത്രമാണെന്ന് ഗർഗാഷ് കുറിച്ചു.
നേരിട്ടുള്ള ഉഭയകക്ഷി ചർച്ചകളിലൂടെയോ അന്താരാഷ്ട്ര നീതിന്യായ കോടതി (ICJ) വഴിയോ തർക്കം സമാധാനപരമായി പരിഹരിക്കുക എന്നതാണ് യു.എ.ഇയുടെ നയമെന്ന് അദ്ദേഹം വ്യക്തമാക്കി.
അന്താരാഷ്ട്ര നിയമങ്ങൾക്ക് അനുസൃതമായി, ഉത്തരവാദിത്തത്തോടും ദൃഢനിശ്ചയത്തോടും കൂടി തങ്ങളുടെ ന്യായമായ അവകാശങ്ങൾക്കായി യു.എ.ഇ പോരാട്ടം തുടരുമെന്ന് ഗർഗാഷ് വ്യക്തമാക്കി.
മൂന്ന് ദ്വീപുകളും ഇറാന്റെ സ്വന്തമാണെന്നും യു.എ.ഇയുടെ അവകാശവാദങ്ങൾ അടിസ്ഥാനരഹിതമാണെന്നുമാണ് ഇറാന്റെ പരമോന്നത നേതാവിന്റെ ഉപദേഷ്ടാവായ വെലായത്തി വാദിച്ചിരുന്നത്.
