അബുദാബിയിൽ റോഡ് സുരക്ഷയും ഗതാഗത സൗകര്യങ്ങളും കൂടുതൽ മെച്ചപ്പെടുത്തുന്നതിനായി ആർട്ടിഫിഷ്യൽ ഇന്റലിജൻസ് (AI) സാങ്കേതികവിദ്യ ഘടിപ്പിച്ച പുതിയ സ്മാർട്ട് വാഹനം പുറത്തിറക്കി. സർക്കാർ സ്ഥാപനങ്ങൾക്കായി ‘യു.എ.ഇ എ.ഐ അലയൻസ്’ (UAE AI Alliance) വികസിപ്പിച്ച് നടപ്പിലാക്കുന്ന ‘വി സിറ്റി’ (V City) പദ്ധതിയുടെ ഭാഗമായാണ് ഈ വാഹനം നിരത്തിലിറക്കിയിരിക്കുന്നത്.
റിപ്പോർട്ട് ചെയ്യപ്പെടാത്ത വാഹനാപകടങ്ങൾ, റോഡിലേക്ക് മറിഞ്ഞുവീണ മരങ്ങൾ, പ്രവർത്തനം തകരാറിലായ ട്രാഫിക് സിഗ്നലുകൾ, ഗതാഗത തടസ്സമുണ്ടാക്കുന്ന മറ്റ് വസ്തുക്കൾ എന്നിവ ഈ വാഹനം സ്വയം കണ്ടെത്തും
വിവരം ലഭിക്കുന്ന നിമിഷത്തിൽ തന്നെ എ.ഐ വാഹനം കൃത്യമായ ലൊക്കേഷൻ സഹിതം വിവരങ്ങൾ ബന്ധപ്പെട്ട സർക്കാർ ഏജൻസികൾക്ക് കൈമാറുകയും, പെട്ടെന്ന് തന്നെ പരിഹാരനടപടികൾ സ്വീകരിക്കാൻ അധികാരികളെ സഹായിക്കുകയും ചെയ്യും.
കേവലം അപകടങ്ങൾ കണ്ടെത്തുക മാത്രമല്ല, റോഡിലെ വിവരങ്ങൾ കൃത്യമായ ഡാറ്റയാക്കി മാറ്റി ഭാവിയിലെ ഗതാഗത പദ്ധതികൾക്കും തീരുമാനങ്ങൾക്കുമായി അധികൃതർക്ക് ലഭ്യമാക്കുക എന്നതാണ് ഈ പദ്ധതിയുടെ ലക്ഷ്യം.
