45-ാമത് ഷാർജ അന്താരാഷ്ട്ര പുസ്തകോത്സവം (SIBF) ഈ വർഷം നവംബർ 4 മുതൽ 12 ദിവസങ്ങളിലായി നടക്കും. ചൊവ്വാഴ്ച നടന്ന വാർത്താസമ്മേളനത്തിൽ ഷാർജ ബുക്ക് അതോറിറ്റി (SBA) പുസ്തകോത്സവത്തിന്റെ വിശദാംശങ്ങൾ പുറത്തുവിട്ടു. 124 രാജ്യങ്ങളിൽ നിന്നുള്ള പ്രതിനിധികൾ പങ്കെടുക്കുന്ന മേളയിൽ, സന്ദർശകർക്കായി സൗജന്യ ഷട്ടിൽ ബസ് സർവീസുകളും വിപുലമായ പാർക്കിംഗ് സൗകര്യങ്ങളും ഏർപ്പെടുത്തിയിട്ടുണ്ട്.
പങ്കാളിത്തം: 1,151 അറബിക് പബ്ലിഷേഴ്സും 1,122 വിദേശ പബ്ലിഷേഴ്സും ഉൾപ്പെടെ 2,000-ത്തിലധികം പ്രസാധകർ പുസ്തകോത്സവത്തിൽ പങ്കാളികളാകും.
പുതിയ രാജ്യങ്ങൾ: ആംഗോള, ബെലാറസ്, കംബോഡിയ, ക്യുബെക്, മ്യാൻമർ, ട്രിനിഡാഡ് ആൻഡ് ടൊബാഗോ, നൈജർ തുടങ്ങി ഒമ്പത് രാജ്യങ്ങൾ ഇത്തവണ ആദ്യമായി മേളയിൽ പങ്കെടുക്കുന്നു.
അതിഥി രാജ്യം (Guest of Honour): ഒമാൻ ആണ് ഈ വർഷത്തെ അതിഥി രാജ്യം. ഒമാൻ സാംസ്കാരിക, കായിക, യുവജന മന്ത്രാലയം അസിസ്റ്റന്റ് ഡയറക്ടർ ജനറൽ അഹമ്മദ് ബിൻ സൗദ് ബിൻ നാസർ അൽ റവാഹി വാർത്താസമ്മേളനത്തിൽ പങ്കെടുത്തു.
യാത്രാ സൗകര്യങ്ങൾ: കുടുംബങ്ങൾക്കും വായനക്കാർക്കും മറ്റ് സന്ദർശകർക്കും മേളയിലേക്ക് എളുപ്പത്തിൽ എത്തുവാൻ സൗജന്യ ഷട്ടിൽ ബസ് സേവനങ്ങളും വിപുലീകരിച്ച പാർക്കിംഗ് സൗകര്യങ്ങളും അതോറിറ്റി ഒരുക്കിയിട്ടുണ്ട്.
ഷാർജ പ്രക്ഷേപണ അതോറിറ്റി (SBA) മേളയുടെ ഔദ്യോഗിക മാധ്യമ പങ്കാളിയും ഇത്തിസലാത്ത് ഗ്രൂപ്പ് (Etisalat) പ്രധാന പങ്കാളിയുമായിരിക്കും.
