യുഎഇയിലുടനീളം ഇന്ന് ഒക്ടോബർ 16 വെള്ളിയാഴ്ച രാവിലെ കനത്ത മൂടൽമഞ്ഞ് അനുഭവപ്പെട്ടു. ദുബായ് മുതൽ റാസൽഖൈമ വരെ വിവിധ ഭാഗങ്ങളിൽ കാഴ്ചാപരിധി (Visibility) വളരെ കുറഞ്ഞതിനെ തുടർന്ന് റോഡുകളിൽ വാഹനങ്ങൾ 100 മീറ്റർ അകലെ നിന്നാൽ പോലും സൈൻ ബോർഡുകൾ കാണാൻ കഴിയാത്ത അവസ്ഥയായിരുന്നു.
ദൃശ്യപരത കുറഞ്ഞ സാഹചര്യത്തിൽ വാഹനയാത്രക്കാർ വേഗത കുറയ്ക്കണമെന്നും ജാഗ്രത പാലിക്കണമെന്നും അബുദാബി, ദുബായ് പൊലീസ് ഉൾപ്പെടെയുള്ള അധികൃതർ എക്സ് (X) പോസ്റ്റിലൂടെ മുന്നറിയിപ്പ് നൽകി. അബുദാബിയിൽ ചില റോഡുകളിൽ വേഗത പരിധി (Speed limit) കുറച്ചിരുന്നു. രാജ്യത്തുടനീളം രാവിലെ 9 മണിവരെ റെഡ്, യെല്ലോ അലേർട്ടുകൾ പ്രഖ്യാപിച്ചിരുന്നു.
ഇന്ന് അന്തരീക്ഷം പൊതുവെ തെളിഞ്ഞതോ ഭാഗികമായി മേഘാവൃതമോ ആയിരിക്കുമെങ്കിലും, ഉച്ചയോടെ കിഴക്കൻ, തെക്കൻ മേഖലകളിൽ കാർമേഘങ്ങൾ രൂപപ്പെടാനും മഴയ്ക്കും സാധ്യതയുണ്ടെന്ന് ദേശീയ കാലാവസ്ഥാ കേന്ദ്രം (NCM) അറിയിച്ചു.
രാത്രിയിലും ശനിയാഴ്ച രാവിലെയോടെയും തീരപ്രദേശങ്ങളിലും ഉൾപ്രദേശങ്ങളിലും അന്തരീക്ഷ ഈർപ്പം വർദ്ധിക്കാനും, മൂടൽമഞ്ഞോ പുകമഞ്ഞോ രൂപപ്പെടാനും സാധ്യതയുണ്ട്.
കാറ്റ് മിതമായ രീതിയിൽ വീശുമെങ്കിലും ചില സമയങ്ങളിൽ മണിക്കൂറിൽ 45 കിലോമീറ്റർ വരെ വേഗതയിൽ ശക്തമാകാനും പൊടിക്കാറ്റിന് കാരണമാകാനും ഇടയുണ്ട്. അറേബ്യൻ ഗൾഫിലും ഒമാൻ കടലിലും കടൽ പൊതുവെ ശാന്തമായിരിക്കും.
അബുദാബി, ഷാർജ, ദുബായ് എന്നിവിടങ്ങളിൽ കൂടിയ താപനില 37°C വരെയും കുറഞ്ഞ താപനില 29°C വരെയും ആയിരിക്കുമെന്ന് പ്രതീക്ഷിക്കുന്നു.
