പ്രശസ്തമായ ദുബായ് ഫൗണ്ടൻ (Dubai Fountain) കൂടുതൽ ആകർഷകമായ പുതിയ ലുക്കിലേക്ക് മാറുന്നു. ബുർജ് ഖലീഫയ്ക്കും ദുബായ് മോളിനും ഇടയിലുള്ള ബുർജ് തടാകത്തിൽ കൂറ്റൻ വെള്ളിയും ലോഹവും ചേർന്ന ശില്പങ്ങൾ പോലെയുള്ള വാട്ടർ ഫീച്ചറുകൾ നിർമ്മിക്കുന്നതിന്റെ ദൃശ്യങ്ങൾ പുറത്തുവന്നു.
ലോഹത്തിൽ തീർത്ത പൂപോലെയുള്ള ഭാഗങ്ങളിൽ നിന്ന് വെള്ളം താഴേക്ക് ഒഴുകുന്ന രീതിയിലാണ് ഈ കൂറ്റൻ നിർമ്മിതികൾ രൂപകൽപ്പന ചെയ്തിരിക്കുന്നത്. ബുർജ് ഖലീഫയുടെ പശ്ചാത്തലത്തിൽ ഇവ പ്രതിഫലിക്കുന്നത് കാഴ്ചക്കാർക്ക് പുതിയൊരു അനുഭവമാണ് നൽകുന്നത്.
പുതിയ ഇൻസ്റ്റളേഷനുകളുടെ നിർമ്മാണ ജോലികൾ തടാകത്തിനുള്ളിൽ ഇപ്പോഴും പുരോഗമിക്കുകയാണ്. ഇതിന്റെ ഭാഗമായി തടാകത്തിന്റെ ചെറിയൊരു ഭാഗം ബാരിക്കേഡുകൾ വെച്ച് തിരിച്ചിട്ടുണ്ടെങ്കിലും ഫൗണ്ടന്റെ ദിനേനയുള്ള വാട്ടർ ഷോകൾ തടസ്സമില്ലാതെ തുടരുന്നുണ്ട്.
മാസ്റ്റർ ഡെവലപ്പർമാരായ ഈമാർ (Emaar) പ്രഖ്യാപിച്ച രണ്ടാം ഘട്ട നവീകരണ പദ്ധതിയുടെ ഭാഗമായാണോ ഈ പുതിയ നിർമ്മിതികൾ എന്ന കാര്യം ഔദ്യോഗികമായി സ്ഥിരീകരിച്ചിട്ടില്ല. 2025 ഒക്ടോബറിലാണ് അഞ്ച് മാസത്തെ ആദ്യഘട്ട അറ്റകുറ്റപ്പണികൾക്ക് ശേഷം ഫൗണ്ടൻ വീണ്ടും തുറന്നത്.
