ദുബായിലെ ഏറ്റവും തിരക്കേറിയ ദുബായ് വേൾഡ് ട്രേഡ് സെന്റർ റൗണ്ട് എബൗട്ട് വികസന പദ്ധതിയുടെ (Dh696-million World Trade Centre Roundabout Development Project) അഞ്ചാമത്തെയും അവസാനത്തെയും മേൽപ്പാലം (Bridge) ഗതാഗതത്തിനായി തുറന്നു. ആകെ 5 കിലോമീറ്റർ നീളം വരുന്ന അഞ്ച് മേൽപ്പാലങ്ങളുടെ ശൃംഖല പൂർണ്ണമായും സജ്ജമായതോടെ മേഖലയിലെ യാത്രാസമയത്തിലും ഗതാഗത കുരുക്കിലും വൻ കുറവുണ്ടാകും.
അൽ മജ്‌ലിസ് സ്ട്രീറ്റിനെ (Al Majlis Street) സെക്കൻഡ് ഡിസംബർ സ്ട്രീറ്റുമായി (2nd December Street) നേരിട്ട് ബന്ധിപ്പിക്കുന്ന 1 കിലോമീറ്റർ നീളമുള്ള രണ്ട് വരി (Two-lane) മേൽപ്പാലമാണ് ഇന്ന് തുറന്നത്.
ഈ പാലം തുറന്നതോടെ അൽ മജ്‌ലിസ് സ്ട്രീറ്റിൽ നിന്ന് സെക്കൻഡ് ഡിസംബർ സ്ട്രീറ്റിലേക്കുള്ള യാത്രാ സമയം 6 മിനിറ്റിൽ നിന്ന് വെറും 1 മിനിറ്റായി കുറഞ്ഞു.
പദ്ധതി പൂർത്തിയായതോടെ ട്രേഡ് സെന്റർ ജംഗ്ഷനിലെ ശരാശരി ഗതാഗത കാത്തിരിപ്പ് സമയം 12 മിനിറ്റിൽ നിന്ന് 90 സെക്കൻഡായി (ഒന്നര മിനിറ്റ്) കുറയും.
പുതിയ പാലത്തിലൂടെ മണിക്കൂറിൽ ഏകദേശം 3,000 വാഹനങ്ങൾക്ക് തടസ്സമില്ലാതെ കടന്നുപോകാനാകും.
ഷെയ്ഖ് സായിദ് റോഡ്, ഷെയ്ഖ് ഖലീഫ ബിൻ സായിദ് സ്ട്രീറ്റ്, ഷെയ്ഖ് റാഷിദ് സ്ട്രീറ്റ്, സെക്കൻഡ് ഡിസംബർ സ്ട്രീറ്റ്, സബീൽ പാലസ് സ്ട്രീറ്റ്, അൽ മജ്‌ലിസ് സ്ട്രീറ്റ് എന്നീ 5 പ്രമുഖ റോഡുകളെ കൂട്ടിയിണക്കുന്നതാണ് ട്രേഡ് സെന്റർ റൗണ്ട് എബൗട്ട്. ഡി.ഐ.എഫ്.സി (DIFC), ഡൗൺടൗൺ ദുബായ്, ദേര മേഖലകളിലേക്കുള്ള യാത്രക്കാർക്ക് ഇത് വലിയ ആശ്വാസമാകും.
