യുഎഇയിൽ ഈ സീസണിലെ ഇതുവരെയുള്ള ഏറ്റവും ഉയർന്ന താപനില ഇന്ന് രേഖപ്പെടുത്തി.
ഇന്ന് ഓഗസ്റ്റ് 9 ചൊവ്വാഴ്ച അൽ ഐനിലെ സ്വീഹാനിൽ 51 ഡിഗ്രി സെൽഷ്യസ് താപനില രേഖപ്പെടുത്തിയതായി നാഷണൽ സെന്റർ ഓഫ് മെറ്റീരിയോളജി അറിയിച്ചു.
ഈ വർഷം ഇത് രണ്ടാം തവണയാണ് താപനില 50 ഡിഗ്രി സെൽഷ്യസ് കടക്കുന്നത്, അവസാനമായി ജൂൺ 23 വ്യാഴാഴ്ചയാണ് 50 ഡിഗ്രി സെൽഷ്യസ് രേഖപ്പെടുത്തിയത്. അൽ ദഫ്ര മേഖലയിലെ ഔതൈദിൽ 50.5 ഡിഗ്രി സെൽഷ്യസായിരുന്നു അന്ന് രേഖപ്പെടുത്തിയ താപനില.
മറുവശത്ത്, ഇന്നത്തെ ഏറ്റവും കുറഞ്ഞ താപനില 26.2 ഡിഗ്രി സെൽഷ്യസ് അൽ ഐനിലെ അൽ ഫോഹിൽ രേഖപ്പെടുത്തി. ജൂലൈയിൽ യുഎഇയിലെ വിവിധ എമിറേറ്റുകളിൽ കനത്ത മഴയും വെള്ളപ്പൊക്കവും ഉണ്ടായതോടെ രാജ്യത്തെ കാലാവസ്ഥ ഈയിടെ പ്രക്ഷുബ്ധമായിരുന്നു. ഓഗസ്റ്റ് 14 മുതൽ 17 വരെ യുഎഇയുടെ കിഴക്കൻ, തെക്കൻ മേഖലകളിൽ മഴ പെയ്യുമെന്നും നാഷണൽ സെന്റർ ഓഫ് മെറ്റീരിയോളജി അറിയിച്ചിട്ടുണ്ട്.
