സഹിഷ്ണുതയുടെയും സഹവർത്തിത്വത്തിന്റെയും പുത്തൻ സന്ദേശം നൽകി യുഎഇ തലസ്ഥാനത്ത് മുസ്ലിം ,ക്രൈസ്തവ,ജൂത ആരാധനാലയ സമുച്ചയം ”എബ്രഹാമിക് ഫാമിലി ഹൗസ് ” യുഎഇ പ്രസിഡന്റ് ഹിസ് ഹൈനസ് ഷെയ്ഖ് മുഹമ്മദ് ബിൻ സായിദ് അൽ നഹ്യാൻ ഇന്ന് വ്യാഴാഴ്ച ഉദ്ഘാടനം ചെയ്തു.
ഒരേ കോമ്പൗണ്ടിൽ ഒരു മസ്ജിദും പള്ളിയും ഒരു സിനഗോഗും ഉൾക്കൊള്ളുന്ന ഇതിന്റെ നിർമാണം പ്രശസ്ത ആർക്കിടെക്ട് സർ ഡേവിഡ് അഡ്‌ജയെയുടേതാണ്. യുഎഇയുടെ സഹിഷ്ണുതയുടെ അടയാളമായിരിക്കും ഈ ദ്വീപിലെ എബ്രഹാമിക് ഫാമിലി ഹൗസ്. അബുദാബി സന്ദർശിച്ച ഫ്രാൻസിസ് മാർപ്പാപ്പയും അൽഅസ്ഹർ ഗ്രാൻഡ് ഇമാം ഡോ.അഹമ്മദ് അൽ തയ്യിബും ഒപ്പു വച്ച മാനവ സാഹോദര്യത്തിന് സ്മരണാർഥമായാണ് ഈ സമുച്ചയം ഒരുങ്ങിയത്.
ഇത് മാർച്ച് 1 മുതൽ കോമ്പൗണ്ട് പൊതുജനങ്ങൾക്കായി തുറന്നിരിക്കും, രാവിലെ 10 മുതൽ സന്ദർശനം അനുവദിക്കും. താമസക്കാരും സന്ദർശകരും അവരുടെ സന്ദർശനത്തിന് മുമ്പ് മുൻകൂട്ടി ബുക്കിംഗ് നടത്തണം. 2019-ൽ ന്യൂയോർക്കിൽ നടന്ന ആഗോള സമ്മേളനത്തിൽ യുഎഇ വിദേശകാര്യ-അന്താരാഷ്ട്ര സഹകരണ മന്ത്രി ഷെയ്ഖ് അബ്ദുല്ല ബിൻ സായിദ് അൽ നഹ്യാനാണ് പദ്ധതിയുടെ രൂപരേഖ ആദ്യമായി അവതരിപ്പിച്ചത്.
പഠനം, സംഭാഷണം, ആരാധന എന്നിവയ്ക്കുള്ള ഒരു ഇടം, ഇസ്ലാം, ക്രിസ്തുമതം, ജൂതമതം എന്നീ മൂന്ന് എബ്രഹാമിക് വിശ്വാസങ്ങൾക്കിടയിൽ യോജിപ്പുള്ള സഹവർത്തിത്വത്തിന്റെയും ധാരണയുടെയും പങ്കിട്ട മൂല്യങ്ങളെ പ്രതിനിധീകരിക്കുന്ന ഒരു സാംസ്കാരിക നാഴികക്കല്ലാണ് എബ്രഹാമിക് ഫാമിലി ഹൗസ്.
പുതിയ സാധ്യതകൾ സൃഷ്ടിക്കുന്നതിനായി വിവിധ സമൂഹങ്ങളിൽ നിന്നുള്ള ആളുകൾ ഒരുമിച്ച് പ്രവർത്തിച്ചതിന്റെ അഭിമാനകരമായ ചരിത്രമാണ് യുഎഇക്കുള്ളതെന്ന് ഷെയ്ഖ് മുഹമ്മദ് ബിൻ സായിദ് ട്വിറ്ററിൽ കുറിച്ചു. അബുദാബിയിലെ എബ്രഹാമിക് ഫാമിലി ഹൗസ് ഉദ്ഘാടനം ചെയ്യപ്പെടുമ്പോൾ, പരസ്പര ബഹുമാനം, ധാരണ, വൈവിധ്യം എന്നിവയുടെ ശക്തി വിനിയോഗിക്കാൻ ഞങ്ങൾ പ്രതിജ്ഞാബദ്ധരാണ്.
എബ്രഹാമിക് ഫാമിലി ഹൗസിൽ ഒരു മസ്ജിദ്, ഒരു പള്ളി, ഒരു സിനഗോഗ്, പഠനത്തിനും സമൂഹത്തിൽ ഇടപെടുന്നതിനുമുള്ള ഒരു ഫോറം എന്നിവ ഉൾപ്പെടുന്നു.
