യുഎഇയിൽ വിശുദ്ധ റമദാൻ മാസത്തിൽ സ്വകാര്യ മേഖലയിലെ ജീവനക്കാർക്കുള്ള ഔദ്യോഗിക ജോലി സമയം മാനവ വിഭവശേഷി മന്ത്രാലയം പ്രഖ്യാപിച്ചു. വിശുദ്ധ മാസത്തിൽ ജോലി സമയം രണ്ട് മണിക്കൂർ കുറയ്ക്കുമെന്ന് മന്ത്രാലയം അറിയിച്ചു. സാധാരണഗതിയിൽ, സ്വകാര്യ മേഖലയിലെ ജീവനക്കാർ ദിവസത്തിൽ എട്ട് മണിക്കൂർ അല്ലെങ്കിൽ ആഴ്ചയിൽ 48 മണിക്കൂറാണ് ജോലി ചെയ്യുന്നത്. ഇത് റമദാൻ മാസത്തിൽ ദിവസത്തിൽ ആറ് മണിക്കൂറായി അല്ലെങ്കിൽ ആഴ്ചയിൽ 36 ആയി കുറയുമെന്ന് മന്ത്രാലയം അറിയിച്ചു.
ജോലിയുടെ ആവശ്യകതകൾക്കും സ്വഭാവത്തിനും അനുസൃതമായി, കമ്പനികൾക്ക് റമദാൻ ദിവസങ്ങളിൽ ദൈനംദിന പ്രവൃത്തി സമയത്തിന്റെ പരിധിക്കുള്ളിൽ ഫ്ലെക്സിബിൾ അല്ലെങ്കിൽ റിമോട്ട് വർക്ക് പാറ്റേണുകൾ പ്രയോഗിക്കാവുന്നതാണെന്ന് ഇതുമായി ബന്ധപ്പെട്ട് പുറത്തിറക്കിയ സർക്കുലറിൽ മന്ത്രാലയം വ്യക്തമാക്കി. അധിക ജോലി സമയം ഓവർടൈം ആയി കണക്കാക്കാം, അതിന് തൊഴിലാളികൾക്ക് അധിക വേതനം നൽകേണ്ടിവരും.
നേരത്തെ, ഫെഡറൽ അതോറിറ്റി ഫോർ ഗവൺമെന്റ് ഹ്യൂമൻ റിസോഴ്‌സസ് (എഫ്‌എഎച്ച്ആർ) വിശുദ്ധ റമദാൻ മാസത്തിൽ ഫെഡറൽ അധികാരികളിലെ ജീവനക്കാർക്കായി ഔദ്യോഗിക ജോലി സമയം ക്രമീകരിച്ച് സർക്കുലർ പുറപ്പെടുവിച്ചിരുന്നു.
സർക്കുലർ അനുസരിച്ച്, മന്ത്രാലയങ്ങളുടെയും ഫെഡറൽ അധികാരികളുടെയും ഔദ്യോഗിക പ്രവൃത്തി സമയം തിങ്കൾ മുതൽ വ്യാഴം വരെ രാവിലെ 9 മുതൽ ഉച്ചയ്ക്ക് 2.30 വരെയും വെള്ളിയാഴ്ച രാവിലെ 9 മുതൽ 12 വരെയും ആയിരിക്കും.
